施寶盛玩咗花式足球 8年，除咗靠喺街頭表演，收入來源主要靠品牌邀請表演，有足球盛事嘅年份會更旺。
爆 Like王
真係神乎其技 花式足球全國冠軍：幻想好多女尖叫
近日網上狂 share一條喺旺角拍嘅片，片中一位年青人表演花式足球，個波好似有磁石一樣，喺表演者身上碌嚟碌去都唔跌，觀眾目定口呆。
呢位表演者其實係香港花式足球員施寶盛，喺香港同中國都攞過花式足球冠軍。一有時間就會喺街頭表演，遇過旺角殺街、陀地報警、同港豬爭執，亦去過歐洲表演，話你知兩地街頭文化嘅差異。
F：《 FACE》 施：施寶盛
F：點解會玩花式足球？
施：本身唔踢波，但中學讀張振興係足球名校，個個都踢咁我又踢。中五時有朋友組隊參賽，欠一個人，因為我讀呢間中學以為我好踢得，其實我成季只係出過兩分鐘場，佢照搵我踢，我出場冇乜掂過個波但贏咗，我好想追佢哋 level於是上網學技巧，點知發現啲玩花式足球嘅片，好震撼！好勁好有型！（係咪想學嚟冧女？）其實係，哈哈！個個男仔踢波都想型嘅！幻想好多女仔尖叫呀！好型呀咁！我就去練花式足球，練到啲隊友都叫我教佢哋，原來肯努力真係會做得到。
F：玩花式足球有咩困難之處？
施：冇乜竅門，幾容易受傷，因為有啲位長期郁動，又好易過度用力或幅度太大，受傷機會比踢波仲多，我右腳韌帶撕裂、左腳都開始有，脊椎骨磨損，最傷係條頸；𠵱家開始用下護膝或腰封，但例如條腰傷，咪練其他招式囉！
F：旺角咁多大媽同騎呢表演，算唔算街頭文化？
施：對於街頭表演，我唔主張有篩選，唔可以因為我唔鍾意就唔畀你喺度，咁係冇咗個文化。我喺街踢波，實有人唔鍾意，如果咁就唔畀人表演係講唔通。不過香港街頭文化係未形成，以英國為例，有一套潛規則，大家嚟表演要排隊，一個做完 30分鐘就到下一個，同埋好尊重大家，大家都唱歌嘅話，會讓畀對方，寧願唔做都唔想阻到人，香港就你唱歌唔得喎！我大聲啲，你又扭大聲啲，可能香港人係着重搵食多啲！而我會慢慢傾，叫觀眾圍埋啲唔好阻到人。
F：有冇遇過令你感動嘅事？
施：有次喺倫敦，有個 homeless嘅人攞住兩袋家檔，喺個袋度攞咗一個用透明袋包住嘅餅乾，分咗一半俾我，話 support我想同我 share，嗰刻好感動！另一次喺旺角表演扭親條腰，痛到坐咗喺街邊，有對夫婦行埋嚟，遞咗個文件袋俾我，講句加油就走咗，我打開睇係一本叮噹相簿，入面有好多我表演嘅相，橫跨 3個月，即係佢哋喺呢 3個月，每次見到我都用菲林相機影，曬埋相送俾我，嗰刻感動到唔記得咗痛；之後新年佢哋嚟俾利是我，終於可以同佢哋講聲多謝！佢哋話睇好你，繼續加油，衝出香港呀！真係好多謝佢哋！
攝影：楊學
|
鍾意就快D Share啦！
|
|
|
