官恩娜怒吼：餵母乳無罪！
去年十月誕下囝囝的官恩娜（Ella），一直堅持餵哺母乳，但她昨日在網上自爆，日前身處某五星級酒店時，因酒店沒有設育嬰室，在得到職員批准情況下到更衣室餵哺，期間卻遭一名女士在她和兒子身旁刻意大聲致電酒店投訴，令她五個月大的囝囝受驚痛哭！慘遭侮辱的Ella，坦言餵哺母乳乃是平常事，不應有偏見，更高呼餵母乳無罪！
官恩娜上載動作疑似餵哺母乳的照片及文字，高呼餵母乳無罪！
官恩娜（Ella）去年十月為外籍醫生老公誕下混血囝囝Gabriel-Antonio Maurellet（bébé G）後，暫時停工專心相夫教子，更表示為給予BB最好的健康，堅持全天候餵哺母乳，雖然母乳之路甚為漫長，她亦曾透露期間被「自以為識餵哺母乳的人」灌輸錯誤及過時的意見，不過仍無阻她餵哺母乳的決心，更不時在網上分享照顧bébé G的心路歷程！
心痛囝囝嚇到喊
昨日Ella突然在社交網站自爆，某日在香港某五星級酒店欲餵哺母乳時，因酒店沒有設育嬰室，她遂向更衣室職員表明意思，獲准許在更衣室餵哺。其時Ella已刻意坐在一邊免騷擾別人，怎料殺出一名中年女，故意在她身旁及bébé G頭頂上大聲地向酒店各部門投訴。雖然Ella有感受辱，但基於當時bébé G被嚇得落淚，最終她沒有與對方理論，忍氣吞聲了事。事後她上載一張動作疑似餵哺母乳的照片，並留言：「嗰日喺香港某五星級酒店嘅女更衣室（因為喺我所在嘅兩層樓都搵唔到育嬰室，亦有問准更衣室職員）餵母乳，畀一個中年女人侮辱！其實我已經故意坐埋一邊唔好阻住人…佢走過嚟故意喺bébé G嘅頭殼頂上面同我塊面側邊大聲敲打電話同大聲鬧有人喺度餵人奶！再超級大聲打電話畀酒店各部門投訴，問人哋知唔知女更衣室發生緊乜嘢事！bébé G都畀佢嚇到喊咗出嚟，我都畀佢嚇到呆咗畀唔到反應。」
獲酒店職員道歉
Ella慨嘆現今餵哺母乳其實是平常事，更力斥對只有五個月大的bébé G不公平，更Hashtag（標籤）「餵母乳無罪」的字句：「點解喺呢個年代都仲有人對餵哺母乳存咁大嘅偏見？寶寶飲媽媽嘅母乳係最天然不過嘅事！我覺得無論如何都唔應該咁樣對一個五個月大嘅嬰兒！事後我個心好唔舒服！#餵母乳無罪！」
事後本報聯絡Ella，她稱當時對方十分緊張，她亦被對方的行為嚇呆及來不及反應，事後亦有酒店職員向她道歉：「自己都同BB一齊，同埋佢講嘢嗰時好近自己同BB同埋好大聲，所以自己嗰下真係嚇到呆咗，我怕嚇親BB，所以冇正面同佢理論。佢打完電話投訴完之後走咗，跟住冇幾耐，都有酒店職員走入嚟，同我講唔好意思。自己冇諗過依家仲有人對餵人奶有偏見，希望可以為所有餵人奶嘅媽媽爭取吓。有時去到一啲商場或酒店，好多時佢哋嘅育嬰室都冇設施畀媽媽餵人奶，要抱住一個20磅嘅BB一邊餵人奶一邊企喺度係一件好困難嘅事。」她又稱曾向老公訴說事件的來龍去脈，老公亦有加以安慰。
採：音樂組
文：專案組
官恩娜上載動作疑似餵哺母乳的照片及文字，高呼餵母乳無罪！
|
鍾意就快D Share啦！
|
|
|
