熱爆娛樂: 一億男主角好錫身　驚青張晉搵人跳海 [壹週刊

2016年4月28日星期四

一億男主角好錫身　驚青張晉搵人跳海 [壹週刊 - 1364] __,張晉,M1,

探熱針

一億男主角好錫身　驚青張晉搵人跳海

下個月便 42歲的張晉，由替身、武指做起，到前年憑《一代宗師》獲最佳男配角，終於捱出頭，近日更拍住余文樂、文詠珊、蘇麗珊在太陽娛樂投資逾一億人仔的新戲《狂獸》升呢做男一。不過向來唔驚死好打得的張晉，竟然搵替身代拍跳海戲，好錫身！

四百萬片酬

蔡少芬老公張晉去年在《殺破狼 2》演大奸角，同泰國拳王 Tony Jaa、吳京鬥打，有口碑有票房。電影於中港兩地勁收五億，太陽娛樂揸弗人黃柏高（ Paco）今年初更一口氣同張晉簽下三部片約，擺明力捧，未開工，先穩袋千二萬片酬的張晉，在新戲中終於擔正做好男人，與大反派余文樂兄弟相殘。

張晉（黃圈） 9歲便習武再入埋四川省武術隊， 98年退役後先做替身。當日拍他被追捕喺船上跳來跳去， easy job。

雖然當日呢場跳海戲有替身（後）上陣，但張晉都冇偷懶，落足眼力幫手睇位。

張晉喺舢舨拍完一輪，替身準備就緒接力跳海。

水底爆炸

上週二（四月十九日），《狂獸》正式埋位，連日來在香港仔石排灣漁類批發市場開工，今時不同往日的張晉不單有助手傍住，休息補妝時更有三人服侍，好有氣勢。當日他拍一場在舢舨船頭被追捕的場面，現場工作人員都大為緊張，不過好身手的他一 take過搞掂，令身在現場的監製鄭保瑞及新導演李子俊唔使操心。但拍一場跳海戲，張晉就未有親自上陣，反而搵替身跳落海。

「張晉喺新戲會打到飛起，打得仲甘過以前，其實都係 Paco刻意安排，因為佢覺得張晉係時候上位，今日呢場落水戲比較簡單，張晉唔熟水性，同埋 Paco想佢留力喺之後爆破嗰場戲，所以幫佢搵咗替身落水。嗰場八號風球水底爆炸戲，佢同樂仔、家棟都有份，三個人都冇得走雞，拍親戲張晉都係最消耗體力嗰個， Paco唔想佢吓吓都咁辛苦。」《狂獸》劇組人員透露。