現年三十八歲、四年前宣布出櫃嘅何韻詩，之前自己一個孭住背囊喺北歐流浪，仲分別去咗芬蘭、丹麥、瑞典、挪威等等嘅地方。點知因為唔住酒店住民宿，結果遇到鹹濕屋主，搞到要上演午夜冰海逃亡。事後，事件傳出多個版本，話阿詩畀民宿男主人扯爛衫之餘，仲要連bra都飛埋出嚟。
件事同啲傳聞爆咗出嚟之後，阿詩本來話詳情遲啲先講，但事隔一個星期左右，佢竟然喺臉書自揭詳情，根據阿詩嘅講法，佢係因為件事愈傳愈離譜，同埋太多人剝花生，所以忍唔住要澄清！
「我當時真係好驚」
佢先嚟：「當晚我喺facebook發嗰個訊息，並唔係因為諗住博見報或者比（畀）雜誌有料寫呢啲低能嘢，而係因為，我當時：真。係。好。驚。如果你自認為（係）一個人，請你找來足夠嘅同理心去明白，性侵犯／性騷擾事件並不是用來講笑的...當然我最後好彩無（冇）事發生，但唔代表大家就可以攞呢種話題嚟消費。」
之後，阿詩發表咗過千字嘅文章，詳述當日事發經過，而佢開始講之前，都「警告」咗大家，段文好長，要慎入。
強調入住前做足資料搜集
「話說我book咗一間一家三口嘅屋企嘅房，個host係個女主人嘅，睇曬（晒）reviews（評論），一致好評，咁就book啦（一個人住我都會加倍小心啲，book啲一家人或女性嘅屋企）。
第一日去到嘅時候（係）下午三點，按門鐘幾次都無（冇）人理，終於三分鐘後個女人睡眼惺忪咁出現，個狀態超迷，問非所答，行咗一轉間屋，機警嘅我已經發現好多啤酒罐同煙頭。我心諗，哇完全貨不對辦，又話好開朗嘅一家三口？
感覺怪怪，好在出完去一轉，返來發現隔離（籬）房原來住咗另一家人，同埋阿老公都返來，感覺都好正常好helpful，係個中年男護士，咁都安心啲。
（一個重點detail：佢地（哋）屋企有個傳統柴火sauna（桑拿）響（喺）basement（地下室），每次用要俾（畀）錢，阿老公要去點火，我第一晚有用，但無（冇）得鎖門只有一個窗簾，但佢強調係private use（私人用途）。佢中途問我洗（使）唔洗（使）加柴我話唔洗（使），因為作為燒烤之星我已經自己加咗喇。）
好啦x2，咁第二朝，隔離（籬）家人走咗，住客得返（番）我一個。傍晚返來家裡（裏）無（冇）人，又見檯上幾個啤酒瓶。我煮飯之際兩公婆返來，眼見今日連阿老公都有點醉醺醺咁，比起第一日亦怪怪的，講講吓嘢無（冇）啦啦要求hug（擁抱）我，但當時無（冇）為意，覺得可能『芬蘭人都係咁』。
結果！！！戲肉嚟喇。
男主人多次要求擁抱
是夜，我又book咗sauna，但我落到去時個火已經燒到一半，焗完第一次已經就快熄。為免佢突然冒出來又問我要唔要加柴，我就自己主動叫上去問佢可否幫我加啦；咁我又無（冇）理由著（着）返（番）曬（晒）衫㗎嘛，加上『芬蘭人都係咁』，係會男男女女披曬（晒）毛巾響（喺）條街度乘涼，咁我覺得入鄉隨俗應該ok啦。
點知！佢落到嚟時上身無（冇）著（着）衫，只著（着）住條legging。我心諗，哇點啊，但又唯（惟）有安慰自己可能『芬蘭人都係咁』啦⋯⋯殊不知佢加完柴之後，望一望我，又無（冇）啦啦埋嚟hug我wor！點啊！！！！赤裸裸hug乜Q啊！
驚覺男方下體勃起
入返sauna，gut feeling（直覺）已經響起警號，有點不安，但礙於柴剛剛先加，唯（惟）有忍到個火燒到咁上下先，跟住快快手沖身諗住著（着）返（番）衫上樓啦。點知！當我關水，佢突然喺廉後出現，問我：「are you inside？」我（即刻披返（番）毛巾）話：「nono！i am outside, don't come in…」之際，佢已經行咗入嚟，下身披住條毛巾。
重點係，佢個下體係明顯地勃起了！！！
而且好明顯係想俾（畀）我見到。
嚇到我，即刻攞嘢話我上返去喇，個變態佬仲要故意跨過我，話佢入去sauna喇，問我要唔要一齊？此刻嘅我，嚇到個心狂跳，深感不妙，即刻耍手擰頭話no no no，拿拿淋（臨）衝返上房！！
返到房，十萬個驚，立刻盤算究竟應該繼續留低定走定點，定著（着）曬（晒）衫唔好訓（瞓）？但礙於我住呢個地方既（距）離市中心三十分鐘路程，完全無車可搭，同埋路上係一片冰海，完全無法用跑嘅方法逃走，亦唔知搵唔搵到酒店。我企咗響（喺）度五分鐘盤算之際，聽到條變態佬叫咗佢老婆落去，跟住就聽到明顯在XYZ嘅聲。
邊逃亡邊回頭望
痴（癡）_線㗎！迅速決定逃走，但為免顯得可疑（認真驚佢攞刀出嚟追我）（補充：阿詩之後喺留言補充，佢入住嗰間屋，係有好多刀嘅），拿拿淋（臨）再落返去扮鎮定，搵個藉口話我想出去睇極光，九秒九執曬（晒）包袱，撇！！！！勉強在冰上快步離開，一路行就一路回頭望，每次有車經過都驚一驚，半個鐘後，終於走到去市中心臨時入住一間酒店。
嗰三十分鐘冰上逃亡係我人生最可怕嘅三十分鐘！」
呢個事發經過雖然長，但其實睇完絕對唔會嫌長，而且仲要感受到當時嘅氣氛有幾咁緊張。而講完晒當日發生咩事之後，阿詩仲作出咗以下澄清：
1）我無（冇）跳窗、逃離嘅時候亦有著（着）衫，零下幾度只著（着）bra，作嗰個有無常識啊？
2）我無（冇）被扯衫，亦無被強暴咁誇，正確嚟講係被性騷擾。
阿詩之後仲大讚中介公司處理事件相當迅速及專業，喺阿詩翌日作出嚴正舉報之後，除咗全數退番錢畀阿詩，仲即刻徹查事件，亦將嗰家人永久剔除。阿詩仲話：「我同佢地（哋）講，真係唔係錢嘅問題，而係擔心萬一日後如果有單身女仔入去住，又遇上咁嘅事，後果不堪設想。」
勸女性遇性騷擾勿啞忍
阿詩之後仲話，單身旅遊嘅女性遇到咁嘅情況，一啲都唔好笑，仲叮囑受害者唔應該沉默：「我相信亦都真係曾經有無數咁嘅個案，而啲女仔決定唔追究，結果害咗自己之餘更害咗下一個受害人。」又叮囑女性單獨出門旅遊，要小心選擇住宿，同埋唔可以退縮同軟弱：「要儘（盡）可能立刻離開現場，打電話話俾（畀）你信任嘅人知，更嚴重者一定要立刻報警。無論點，一定要為事件討回公道，絕對不能不了了之。」
|
鍾意就快D Share啦！
|
|
|
