映藝成立之初，公司地址喺觀塘，現已搬到九龍灣億京中心。呢間辦公室亦係華仔喺巴拿馬嘅最新申報地址。（翁少陽攝）
眾人諸事
劉德華開離岸公司 處理物業投資
從「巴拿馬文件」發掘到嘅香港名人資料愈嚟愈多，影視界之中，除咗本刊上期報導過成龍開設 BVI離岸公司之外，原來劉德華都有幫襯資料外洩嘅巴拿馬律師行 Mossack Fonseca& Co.。
文件顯示，原來華仔二○○○年成立一間叫做 Capital Time Development Ltd.（ CTDL）嘅 BVI公司，係公司嘅唯一董事，亦係公司股東。華仔一五年申報嘅地址係九龍灣億京中心 A座九樓，即係佢創立嘅映藝控股有限公司嘅辦公室，專做電影同藝人管理嘅相關工作。
咁 CTDL即係做啲乜？文件話用途係「控股公司」（ Holding company）。睇番過往新聞， CTDL全資持有另一間 BVI公司 Media Global Assets Limited（ MGAL），○四年 MGAL曾入稟法院控告加際娛樂侵犯版權，推出《劉德華經典重現》唱片；另外華仔將原本由爸爸劉禮持有嘅兩個加多利山物業，轉到一間名為 Top Famous嘅公司，呢間都係由 CTDL持有。睇嚟 CTDL專係處理華仔嘅私人投資同業務。
華仔透過經理人公司作出書面回應，表示 CTDL只係一間控股公司，主要持有一間香港公司嘅股份，本身並無經營任何業務。
華仔身份證副本加密
值得一提嘅係，記者喺文件中只係見到劉德華嘅英文名同簽名，以及身份證號碼，但用嚟核實華仔身份嘅身份證副本文件，則要求密碼先至開到，記者之前查嘅十幾個人物都未遇過相同情況，睇嚟華仔聘用嘅呢間秘書公司做嘢非常小心。
查實華仔本人亦非常謹慎，喺香港查冊搵到嘅資料，佢唯一擔任董事嘅公司叫做「劉德華慈善基金會有限公司」；佢創立嘅映藝，○三年成立之時，都係由兩間 BVI公司（ Castle Equity Enterprises Limited及 Talent Excellent Limited）持有及擔任董事；現時董事則由另一間 BVI公司 Showcase Assets Limited擔任。唔知點解華仔咁鍾意 BVI公司呢？
689認識貧窮 示範真虛偽
食衞局前政助陳智遠本週日喺 facebook力數香港出現「虛偽七事」，狂轟高官富豪虛偽，「呃嬲達人」梁振英即日作出真人示範，佢同一日喺 facebook話出席貧窮體驗日，仲扮單親爸爸，透過做洗碗工月賺九千蚊養活一家五口，仲「略有盈餘」，成功喺廿四小時內呃到八千個嬲。
香港五人家庭月入中位數係四萬五千蚊，官方貧窮線以中位數一半計算，但 689呢一家「月入」只及貧窮線四成，都竟然可以夠錢使。現實係扣除劏房租金起碼三千蚊，未計水電煤開支同 689口中嘅學費車費，呢家人每人每月得番千二蚊用，即係每日四十蚊，真係食三餐都肯肯定唔夠錢，但原來齊心就可以有錢剩，咁究竟活動叫參加者體驗出乜嘢貧窮呢？唔怪得梁振英自吹自擂，話「貧窮問題的解決已經有了曙光」
貧窮體驗日嘅搞手係由梁粉組成嘅齊心基金，以智庫之名實情係幫梁振英造勢；另一個就係國際青年商會，成員來自商界青年領袖同企業負責人，現任會長關德仁喺中原金融集團工作，同時係一帶一路發展聯會嘅常務會務顧問，同梁振英一定好投契。
劉鳴煒英籍方便之謎
青年事務委員會主席劉鳴煒，因為巴拿馬文件被揭露係英國籍，事後解釋係未成年時媽媽幫佢申請，又對親北京報章自稱香港人，為方便外遊先保留英籍。
究竟揸英籍係咪咁方便旅遊呢？記者統計過依家英國護照免簽證國家有一百七十五個，特區護照免簽證國家就有一百五十六個。英國護照大約有五十幾個免簽證國家，持特區護照人士都要簽證，但當中好多聽都未聽過，好似非洲嘅聖多美和普林西比、厄立特里亞、中美洲島國安提瓜和巴布達、西印度群島最東嘅巴巴多斯同南太平洋島國瑙魯等，相信劉生未必識或者會去旅遊。
其中嘅大國，其實得澳洲同美國，其餘港人較熟悉又會去嘅國家，可能係緬甸、柬埔寨同越南。劉生咁好 package，可能會選擇去尼加拉瓜睇大瀑布，或者去不丹體驗當地人有幾快樂。
咁到底點解有英國護照方便啲？得劉生自己知。除非佢要親自去巴拿馬睇吓啲文件，咁放棄英籍之後，就要申請簽證，麻煩啲囉。
撰文：巫不言
news@nextdigital.com.hk
|
鍾意就快D Share啦！
|
|
|
