豪語錄
誤落塵網中 石詠莉
沙無適俗韻，性本愛丘山。
誤落塵網中，一去三十年。
——陶淵明《歸園田居》
石詠莉廿九歲，有大段日子算白過了。並非說做人必定要清高；而係，早知憑靚聲出 Hi-Fi碟已榮登今屆十大暢銷歌手，當初就唔使又性感又標榜整容地參加組合 Freeze啦，走咗咁多寃枉路。
由吸引看客變吸引真心聽眾，石詠莉坦言：「要洗底的。」過冷河還得吊鹽水，期間她為幫補收入，經歷唱內地夜場、遭禁錮……種種不堪回首的俗不可耐。
事業現轉機，男友鄧健泓乘勢求婚，照計雙喜臨門；之但係難得上位，又應否衝多段才嫁？鄧健泓這天陪她來影樓，拉喼彎身替未婚妻揀衫，死不願出鏡，自嘲：「我怕拖低她。」
跳離一張網，石詠莉會不會誤落另一張（情）網之中？
洗樓
公平地講，鄧健泓唔算夫憑妻貴——石詠莉的「暢銷」數字，一萬張，男方早在《朋友二號》已經達標；只是當年置身「賣三萬靠邊站」盛世，無緣同獲女友的榮譽，過來人了。
唱片市道，愈來愈差。
石詠莉嘆氣：「 Patrick成日話冇人再聽他唱歌，我覺得好傷心。」
伊人事業卻意外驚喜，「第一批出貨三千，幾日賣清，要加印，感恩的。」
秘訣靠 Hi-Fi靚聲？
「就是用真樂器、一 take過唱。其實，別動不動說 Hi-Fi碟高檔；外國根本無分，毋須標榜，隻隻碟都重視錄音質素。我希望香港流行音樂可以咁，即使 Freeze的歌都值得靚啲。」
花更多心血，包括購買版權。「集中同一間公司的歌，一 log買會平啲；但揀歌還是要以感覺行先，所以分開買。例如《如泣如訴》，奇怪點解咁耐冇人翻唱嘅？原來這首版權特別複雜特別貴；有一刻諗過放棄，最後都忍唔住買。」
伴奏多謝樂師們收友情價，但資金畢竟有限（鄧石小兩口自資），石詠莉說：「死慳死抵，不想在音樂上慳，惟有在宣傳費慳，我們創先河『洗樓』——自己逐間跑影音店，求店家將隻碟放在試聽架，幫助銷情。」
盲頭烏蠅
翻唱，俗稱「口水歌」，有苦衷的。「成本並不比創作平（版權加改編編曲）；但勝在聽眾已經熟悉旋律，唔使諗歌詞，專心聽我唱成點。第一隻 MV，我剪輯嘅，全部背影，連歌手名也不落，希望由聲音重新認識我。」
以至唱片封套僅以 Sukie's之名，不提石詠莉寶號。「係，洗底！」她坦承。
Freeze的石詠莉，與 Hi-Fi太格格不入。
「我同自己講，千祈唔好時光倒流。怎說呢，夢想是唱歌，公司話做組合，會唱主音，有獨唱機會，我即刻𦧲飯應啦，點諗到落差咁大？當時我一味聽話，食得鹹魚抵得渴。
「 Freeze解散了四年，總之不能走回頭路，再性感，心理會頂唔順。但又咁講，沒以前，便沒現在的學習。百感交集。」
說性感還客氣，直接就係「整容三嬌」——那是 Freeze本身也不避嫌的綽號。究竟石詠莉有冇整容？
「冇。我考慮過，還是那時不作澄清的好，因為兩位 teamates做緊美容院整容代言人，我話自己唔係，會對她們造成很大傷害，公司又覺得係 gimmick，於是我獨自承受，好無奈。組員之間的感情？麻麻啦，年齡差距大。」
這是一條弔詭命題——在悖謬的世代，承認（甚至唔係照認）整容，總有人讚你夠噱頭夠豁出去；但咁又點？勇氣欲速不達，到頭來 Freeze不成功、硬銷整容不成功，損了尊嚴，偷雞唔到蝕拃米。
「就是盲頭烏蠅，心口得個勇字，冇思考，後悔用錯了力。」
原來，毋須整色整水，她是村姑 Sukie——返璞歸真憑靚聲便紅。
冰河時期
過冷河，時間沖淡既定形象，石詠莉自嘲冰河期。本來冇壞，當悠長假期囉——千金小姐嘅話。不過她要養家，幫補收入，靠上大陸去唱夜場。
「有次嚇窒的經歷，助手被爆樽，我被困在一間房，因為拒絕毛手毛腳，我有我底線，搞事的人是黑底，唔俾我走。後來場主出手擺平，我和助手漏夜飛的士往機場，明明朝早才有航班都唔敢返酒店先，怕跟踪。
「機場至少安全啲。」
國內的機場，的確「至少」……
非王子
讀者信不信石詠莉咁純？連鄧健泓起初都唔信，這天他偷偷告訴筆者：「以為她是那種辣妹；點知我整天在家填詞，她可以全程在旁睇睇書煲煲碟煮煮飯玩玩狗就滿足，原來，她很『宅』。」
夜場出事時識咗鄧未？有否王子救美？識咗，遠水都救唔到近火啦。
何況，鄧健泓從不是王子。
石詠莉說：「他是個坦誠的男生，未拍拖已告訴我他得幾多錢，以前啲女朋友咁咁咁所以咁咁咁。」
冇得唔坦誠，鄧健泓戀愛史路人皆知，之前更發生他倆街頭撞正鄧前度李詩韻事件，石詠莉大方合照。
「她（指李詩韻）好 nice，我又鍾意望靚女。可以做番朋友是他們成熟，點解介意？
「 Patrick愛家人，愛小動物，多才多藝。」唱片封面鄧健泓操刀拍攝。
偏偏沒提在音樂上幫到手（鄧健泓也曾是矚目歌手）。
「那是 bonus，愛情並非看他為我做什麼，是看兩個人可以共同建立什麼——係肉麻㗎，佢都笑我揀佢係好蠢。」
非公主
蠢，包括答應了男方在頒獎禮後的求婚。照計，難得紅起來，冇理由咁快嫁。
石詠莉說：「時代不同了，以前要收收埋埋，現在大家喜歡真實，總有愛屋及烏的 fans。人生存不是為別人活，是為自己和愛的人。
「我們已經做娛樂圈，唔想婚禮都似一場 show，未諗點安排……」
準新郎插口道：「搵咗律師。」倒實際。
準新娘續道：「如果不是屋企人要求擺酒，本想仲簡單啲，簡單而創意，我們不特別有錢，唔使公主式。」
賣碟賺來的錢，投放於下一張製作，因為繼續自資，希望保持音樂主權——應該來一次情侶合唱？
鄧健泓說：「會嘔的，怕拖低她水平。」
其實，應景嘅係《同是天涯淪落人》。
網•惘
作為軍師，鄧健泓說：「這張唱片的廣告主要放在印刷媒體，甚少擺上網。」
有點道理，網民貪免費 download，未必係肯花錢買 Hi-Fi碟的目標消費者。
唉，搞上網，本身也是一種塵網、一種迷惘——以為很有噱頭很豁出去咩；到頭來，可能像石詠莉般用錯了力、走寃枉路。
歷史冇得返轉頭，紙媒和實體 CD有一天會過去；但石詠莉固執，她的唱片，索性出埋黑膠版本。
撰文：余家強
攝影：黃志明
攝錄：葉志明
協力：歐陽慧芯
化妝： Kayte Fung
髮型： Base@ihair& Nails
服裝： Club Monaco、 Melissa Bui
|
鍾意就快D Share啦！
|
|
|
