探熱針
甩難艷尼釋智定 犯戒連卡佛掃貨
被翁靜晶連番爆大鑊的大埔定慧寺女住持釋智定，荒謬至極，向入境處聲稱與丈夫釋智光為真心相愛的「真正夫妻」，成功避過「假結婚」的偵查，獲無條件釋放。
暫時甩難，潛水無影多時的釋智定，近日再度現身。本月 15日（週五）在前定慧寺董事兼會計的江博文陪同下，口罩、帽，全副武裝上陣在 ifc出巡，去完連卡佛掃貨，約埋江的女友直落去正斗醫肚。自知是非纏身，行事謹慎的釋智定，臨離開時將連卡佛的收穫收好，並將紙袋交由江代為丟掉，以為神不知鬼不覺，又邊估到會百密一疏，被斷正呢？
ifc大開買戒
本月十五日（週五）下午五時半，除下僧服，打扮同師奶無分別的釋智定，在被指有份替定慧寺做假數的江博文陪同下現身中環 ifc。放工時間，人來人往，冷帽拉低到貼眼眉、口罩拉到上眼肚位置的釋智定，神情閃縮，反而令人望多幾眼。當時釋智定手上已拎住一大袋連卡佛戰利品，明顯已經有所收穫。
在 ifc上上落落，再找不到心水店鋪 shopping，一度將口罩拉低的釋智定，同江博文向住機鐵方向進發，乘搭電梯期間，有迎面而過的途人望多兩眼，釋智定即慌忙把口罩拉上，刻意擰歪面避開對方雙眼。兩人去了正斗雲吞麵攞位開餐，約十分鐘後，釋智定離開餐廳前往洗手間，購物慾極強的釋智定連附近的店鋪都不放過， agnes b.等逐間入，慢慢睇完才捨得去洗手間。
友人執手尾
原來當晚飯局還有江博文的女友，去完廁所的釋智定忽然換上 cap帽開餐，各人除了有碗麵或粥，還叫了兩碟菜和一大碟疑似牛腩的食物，一直處於高度戒備的釋智定，只要有人行過身邊，都一定上下打量望到實。一行三人，食到晚上八時才捨得走人，一直由釋智定拎住的連卡佛戰利品，離開時改由江博文拎住，三人邊行邊講，往機鐵站外的的士站進發。
臨上車前，釋智定將連卡佛的戰利品改放在自己的手提袋裡，並跳上的士離開。同行的江博文則幫手將紙袋拎入機鐵站內的垃圾桶丟掉，做盡一個好市民應有的責任。
翁靜晶嗌癲
披住出家人的面具過着奢華生活的釋智定，被翁靜晶連環踢爆臭史，日前對方又再踢爆艷尼夫妻繼續巧立名目，叫人付錢超渡，實際為自己荷包進賬。對於釋智定喬裝普通人行 ifc，翁靜晶大為驚訝：「吓！唔係啩，癲㗎！佢今次有冇著皮靴戴假髮？點解你哋咁都認得佢？」（釋智定是否行蹤不明？）「我哋經過調查，定慧寺後山有條路，可以不經前門走到！呢個係佢哋（釋智定）一個走落山的渠道，我哋有人住喺佢對面 mon住，又有傳媒喺佢大雄寶殿對面租咗間屋，都見唔到！」被人全天候監視，都有本事甩身至中環開心 shopping，艷尼釋智定絕不簡單！
三宗罪
06年成為定慧寺女住持後，賬目混亂，又涉假結婚，醜聞愈爆愈有。
假結婚
去年十月，釋智定涉與兩名內地和尚假結婚，並協助對方來港定居，被入境處拘捕，其後，釋智定向執法部門表示二人是真心相愛的真夫妻，令執法人員束手無策。
僭建骨灰龕位
定慧寺部分土地為官地，而釋智定非法僭建三個骨灰龕堂，違規經營骨灰龕，超過二百個骨灰位，售價升至十五萬一個；今年二月，被地政總署勒令停止非法佔用未獲批用的土地。
用善信捐款
去年被揭用善信捐款購入數百萬元人壽儲蓄保險，而豪花十一萬買名牌化妝品、金飾及矯形內衣，共八十九萬元的信用卡數，而全部開支被納入寺院的維修支出。
撰文、攝影、攝錄：娛樂組
|
鍾意就快D Share啦！
|
|
|
