娛樂偵訊
陳凱琳走漏眼 鄭嘉穎破戒煲煙
半百中坑鄭嘉穎去年拍攝劇集《殭》，搞掂又靚又有米的九十後港姐陳凱琳（ Grace）。以往歎慣散餐的鄭嘉穎，難得今次玩認真，拍拖一年已心急逼婚。
據知過往奉行男尊女卑的鄭嘉穎，仲一反常態，為女友戒煙、戒蒲、戒粗口，仲返埋教會，表面上改邪歸正。但早前趁女友開工，鄭嘉穎約朋友 high tea，冇王管馬上現形，臨走前破戒匿後巷煲煙。
跟埋信主
僅得廿四歲的陳凱琳，近日出席活動承認有同嘉穎傾結婚：「大家傾過有共識，可以慢慢嚟……計劃會有家庭同小朋友。」仲話諗定要返加拿大擺酒，恨嫁恨到出晒口！
口口聲聲話自己守身如玉，兼且係虔誠基督徒的 Grace，搭上鄭嘉穎後，就瞞住老豆去男友屋企過夜，搞到陳父大呻「蝕本」。為保住貞節牌坊， Grace拉埋嘉穎一齊洗底，約法三章要男友戒煙、戒蒲、戒粗口，最近仲成功勸掂男友跟埋信主返教會。
「嘉穎同 Grace原本就係兩個世界嘅人， Grace屋企好嚴，細細個就好守規矩，嘉穎都知 Grace嘅父母唔會咁容易會接受佢，所以佢都肯為 Grace戒緊啲壞習慣，等大家距離近啲。」嘉穎身邊人透露。
後巷扯煙
講就容易！早前趁住女友有工開，鄭嘉穎相約女伴 high tea。當日下晝四點，嘉穎同友人現身中環的士丹頓街，過馬路時，嘉穎仲好有風度捉住對方手臂，之後二人走入近期好 hit嘅「 lobster central」歎龍蝦包。食完之後，嘉穎走出門口，鬼鬼祟祟兩頭望，之後就摩打腳匿入後巷，同友人齊齊點煙，吸完之後，齊齊上車離開。
另一邊廂，啱啱去溫哥華放完大假的陳凱琳，日前就現身赤柱大街一間西餐廳拍飲食節目，出名世界女的 Grace，對住工作人員時時刻刻都保持四萬笑容，就算 NG都毫無怨言，交足戲！一唔使埋位， Grace就拎住部電話搏命篤。嘉穎咁鬼馬， Grace真係要 check實啲，唔好走漏眼呀！
打動另一半
圈中出現不少虔誠教徒，甚至可以打動另一半，決志信主，有共同目標及信仰，特別夾。
鄭秀文 許志安
07年 Sammi受洗成為基督徒，而她的心願是希望另一半亦是教徒， 11年， Sammi與安仔復合，本來信佛的安仔亦被打動決志，參加教會查經班；早年，在 Big Four演唱會拜神儀式，安仔未有上香，只是站在一旁低頭祈禱。
撰文、攝影、攝錄：娛樂組
|
鍾意就快D Share啦！
|
|
|
