熱爆娛樂: 還個唱債　徐小鳳每場三百萬全包　自製慳水海報 [壹週刊

2016年4月28日星期四

還個唱債　徐小鳳每場三百萬全包　自製慳水海報 [壹週刊 - 1364] __,徐小鳳,M1,

探熱針

還個唱債　徐小鳳每場三百萬全包　自製慳水海報

「熱烈地彈琴，熱烈地唱……」自從小鳳姐經典歌《喜氣洋洋》俾網民冇限 loop，多咗一班網友粉絲的她，今年七月開個唱，據悉除了食住個勢，還順便償還欠下兩年的歌債。

小鳳姐再出場，有指收三百萬一場玩全包。為賺到盡樣樣慳，其中海報玩懷舊，實質是慳水之作。

全包慳賺到盡

近年貼地到爆，連《 100毛》頒獎禮都撐場的小鳳姐，事隔兩年再開個唱，市道不景氣下仍一口氣開六場。天王天后收最多收一百萬一場的演唱會歌酬，小鳳姐出場就企硬收三百萬。據悉擁千萬身家的她，出名數口精，嫌單收歌酬唔夠賺到盡，實行收三百萬玩全包宴，製作、台、燈、聲、化妝及服裝等，連海報設計都一手包辦，控制成本，袋多一筆。

深明 sell鬼馬唔使 sell靚嘢，一手包辦個唱製作的小鳳姐，海報索性用舊相玩懷舊，慳水慳力慳功夫。

今年初小鳳姐去全城熱捧嘅 100毛頒獎禮，年屆 67依然貼地兼轉數快，當晚獲全場觀眾齊鼓掌，贏得網友心。

預收千萬歌酬要還

早前個唱記招， Backdrop放滿小鳳姐靚女舊相已經夠照，美術設計都慳番。

在小鳳姐的精打細算下，七月個唱便設計出慳水慳力，只放兩張舊相，大條道理玩懷舊的海報。配上生鬼口號：「既然青春留不住，不如有請小鳳姐。」搵錢有道的小鳳姐，果然食腦。

據悉今年的個唱，其實是為還演唱會債。「一四年佢同英皇一簽十五場個唱，雖然最後只開咗八場，但小鳳姐已一炮過袋走十五場，四千五百萬酬勞。當時開完個唱，小鳳姐仲話將會開 part 2。不過因為市道唔好，結果一拖拖到今年，英皇將小鳳姐演唱會合約賣咗俾幾間公司，剩低嗰七場要還債，所以就算波點裙著完再著，用舊相做海報都可以理解，對於包埋製作嘅小鳳姐而言，梗係愈慳得多，就愈袋得多嘛！」知情者說。