探熱針
打理酒店 開餐廳 超蓮 08返工 做三房掌舵
被喻為賭王何鴻燊「最索千金」的三房超蓮，去年底與台灣藝人吳克羣分手唔夠半年，觀音兵排住隊爭蓮。緋聞成何家千金之冠，但原來她正積極為何家出力，打理三房業務。
日前發現超蓮為幫母親拓展江山，晨咁早就上班。換上一身 OL打扮，超蓮做三房掌舵，行成熟風。
四大會計師樓取經
將踏入二十五歲的何家千金何超蓮，自去年底跟抽水王吳克羣斬纜後，車輪轉的觀音兵蜂擁埋身。有內地富二代的劉根森、本土霍家公子霍啟山及向華強大仔向佐、最近又有新加入的台灣藝人柯震東，在超蓮身上全是緋聞。
觀音兵排晒隊，感情生活看似精采的超蓮，其實暗裡積極做何家三房女掌管。一二年以一級榮譽成績畢業於英國著名學府倫敦大學皇家賀洛唯學院經濟學學士的她，是三房第一個大學畢業生，一直被母親三太寄予厚望，所以畢業後超蓮為充實經驗，靠自己成功應徵到全球四大會計師事務所的「 Ernst& Young」（安永）工作，之後又轉到北京的「安永」分所繼續取經，直至一四年奉母命回港。
做掌舵朝八上班
一直想把超蓮打造成三房女強人的三太，見愛女回復單身，即下旨把屋企的業務，包括她持有的澳娛、房地產投資及直升機生意等交給超蓮及龍鳳胎胞弟、同樣在大學取得會計及財經學士學位的猷啟合力打理。奉母之命做掌舵，據悉大把人追的超蓮要將感情事放埋一邊，專心幫媽咪拓展江山。
上週五（四月二十九日），接手打理屋企生意的超蓮，晨咁早八點半就出門返工，好鬼勤力。當日第一站唔係返媽咪在上環招商局的總公司，而是到中環的中銀大廈開會。只得二十五歲的她返工刻意打扮成熟，全白上班 suit，一身 OL打扮照樣索。
酒店打骰開餐廳
至中午十二點，開完會的超蓮與一名高層一齊離開，由司機載返上環的公司總部，冇外出歎個 lunch，就直踩至傍晚六點才收工返家。據了解，準備考埋會計師牌的超蓮，現主力幫母親在澳洲的酒店項目打骰，還籌備自己的創業作。
「三太好多業務，超蓮負責幫佢睇住盤數同拓展。近期佢主力幫媽咪睇實澳洲間酒店重組，要翻新裝修同埋物色新嘅管理集團。佢一邊幫媽咪手，又一邊籌備緊開西餐廳，地點搵緊，預計年底開，佢好鍾意煮嘢食，所以創業作要做飲食。
「依家佢係好多人追，不過超蓮唔想分心，加上俾吳克羣傷過，媽咪又想佢同細佬拍住上，接管屋企啲生意，所以佢唔會諗拍拖住，要發力做嘢！」知情者說。
25歲猷啟（左）
14年畢業美國 Bentley大學會計及財經學士學位的他，一直替家族打理香港及海外的地產生意。早前在母親提拔下擔任東華總理。
27歲超雲（中）
曾就讀英國 Kingston University，之後轉校到 Central Saint Martins College未畢業。醉心設計及時裝的她，數年前開設潮店 Chew Closet，出售二手衫。
撰文、攝影、攝錄：娛樂組
|
鍾意就快D Share啦！
|
|
|
