熱爆娛樂: 黎明個唱開得成　舒淇中環 Hea行唔去睇 [壹週刊

2016年5月5日星期四

黎明個唱開得成　舒淇中環 Hea行唔去睇 [壹週刊 - 1365] __,黎明,舒淇,M1,

娛樂偵訊

黎明個唱開得成　舒淇中環 Hea行唔去睇

黎明在香港首創 4D演唱會，因為用了中國製帳篷，過唔到消防處，搞到第一場要臨時取消，好彩坎坷過後有騷開。由於今次事件引起全城關注，反而更吸引人要去睇騷朝聖，一睹「危機處理」高手黎明嘅風采，搞到核心內圍同核心外圍都逼爆人，場面墟冚！

不過，凡事總有例外，曾經同黎明拍拖七年，最後被飛的舒淇，對於舊愛幾乎開唔到騷，就表現得唔多關心，上週六（四月三十日）舒淇現身中環 Hea行，就算只係距離場地核心內圍只有八百米，她都唔去捧 Leon場，問到 Leon的事她都扮聽唔到！

群星朝聖

有驚無險，黎明（ Leon） 4D演唱會最終都開得成，仲吸引唔少明星入場朝聖，好似廿年前同 Leon傳過緋聞的李嘉欣就拖住老公許晉亨睇第一場，而曾經講過從來冇買過三大天王（黎明、劉德華及郭富城）唱片的陳奕迅，今次都破例撐 Leon，連曾經同 Leon搞到不歡而散要轉唱片公司的楊千嬅，都有到場支持，可想而知今次 Leon演唱會有幾矚目。

Leon今次開騷狀態大勇，明顯瘦番回復靚仔樣。

Eason同單立文夫婦，上星期六晚一齊去捧 Leon場。

曾經同 Leon傳了多年緋聞的李嘉欣，拖住老公去捧場。

Leon曾經是楊千嬅的老闆，但因意見不合，傳出不和。

鄭秀文同蘇永康睇得好開心，騷後 Sammi更表示希望同十八年前合作過拍《愛你愛到殺死你》的 Leon再合作拍戲。

Leon前妻樂基兒表示要去旅行，所以唔會去睇 Leon演唱會。

但係， Leon的舊愛舒淇就似乎對這件事毫不關心，在 Leon宣布首場個唱取消當日（四月廿八日）遇啱她要出席品牌活動，得知 Leon取消的消息，舒淇竟然笑住話：「吓！好彩我哋冇取消啫，哈哈哈！」

上週六舒淇在中環行街，問到她會否去支持舊愛 Leon，她十問九唔應。

上星期四，即 Leon宣布首場演唱會要取消的當日，舒淇仲笑笑口回應有關舊愛問題。

98年 Leon同舒淇拍電影《玻璃之城》撻着，兩人拍拖七年，但 Leon從未公開承認二人情侶關係，最後更因徐子珊介入，舒淇遭 Leon狠飛。

漠不關心

上星期六（四月三十日）下午五時左右，舒淇與助手在中環現身，戴住帽同黑超的她在歷山大廈漫無目的 Hea行，唔通她要等夠鐘去距離唔夠八百米嘅中環海濱，睇 Leon演唱會。

於是記者上前問舒淇（今晚）會唔會睇 Leon演唱會，會唔會支持佢， Leon有冇俾飛你？舒淇都頭岳岳四圍望，扮聽唔到刻意迴避記者提問，最後仲走入文華酒店行秘道離開，到目前為止仍未見她去捧舊愛場。