人有三急，馬天佑當眾露械，對住草地射尿，身後的吳千語笑騎騎，幫手睇水。
娛頭
數碼港施肥 馬天佑當住吳千語露械屙尿
同林峯拍拖三年，吳千語終於成功𦧲掂林峯買大屋同居，疊埋心水等做「廈門新抱」。最近，長時間游手好閒的千語 BB，幾乎日日喺數碼港公園出沒。
日前千語 BB約埋情同姊妹的形象指導馬天佑孖咇放狗，其間馬天佑人有三急，懶得去搵廁所，竟然就地解決。光天白日當眾露械，「小天佑」見光!身旁的千語 BB完全唔覺得尷尬之餘，仲笑笑囗兩頭望，幫手睇水。快速解決完後，馬天佑連手都唔洗又繼續撚狗，好唔衞生啫！
好姊妹陪玩
林峯為個唱閉門加操，陪玩陪食陪買的重任就交俾老友馬天佑。今年廿七歲的馬天佑，同千語 BB年紀相若，在圈中冧掂唔少大星，好似 Baby、阿 Sa、 Joey，全部係佢客仔，加上同千語 BB有同一嗜好，鍾意 shopping使錢買名牌，志趣相投，所以林峯唔喺身邊，馬天佑就成為千語 BB嘅「最佳伴侶」。個多月前馬天佑做伴遊陪千語 BB遊法國掃貨，跟手再去英國睇騷。返到香港二人繼續做連體嬰，連林峯個唱，都孖住一齊捧場，完騷後再一齊消夜直落，仲痴纏過情侶。
當眾射尿
早前二人又約埋一齊去公園放狗。當日下午，千語 BB帶住兩個工人同埋三隻愛犬現身數碼港的狗公園會合馬天佑。一身街坊裝的千語 BB拖住愛犬，同馬天佑邊行邊傾，雞啄唔斷，仲時不時放聲大笑。三隻狗仔放緊電時，二人突然撇低工人同狗仔，鬼鬼祟祟急步行去公園暗角匿在樹後，馬天佑二話不說鬆開褲鏈，原來係人有三急，馬天佑懶得搵廁所，寧願當眾露出「小天佑」就地正法，對住草地射尿。半分鐘唔使，馬天佑火速完事，快手收埋「小天佑」，笑笑囗拉番褲鏈。
千語睇水
老友隨處小便兼當眾露械，身旁千語 BB若無其事，而且笑笑囗企喺後面，兩頭望幫手睇水，確保四周冇人，完全冇尷尬。至於小解完後的馬天佑，竟然連手都唔洗就繼續玩狗。冇公德心之餘，仲連衞生常識都冇！
玩足一粒鐘，人同狗都冇晒電，一行人準備打道回府，唔夠九十磅的千語 BB拖住大狗，鬼咁吃力！馬天佑就幫手抱住貴婦狗仔，去商場逛了一圈後，就跳上保母車返歸。
以笑遮醜
上週日（一日），林峯演唱會尾場，慶功宴上馬天佑被問到當眾露械一事，表現非常尷尬，仲不停以笑遮醜。
壹：你哋係咪一齊放狗呀？
馬：咦？你又知嘅？
壹：我哋影到你喺公眾場合屙尿？點解唔搵洗手間去呀？
馬：因為嗰度方圓十里都冇洗手間！（其實公園入面有洗手間，真係搵唔到，附近商場都有囉！）
壹：你知唔知咁樣係犯法呀？
馬：我知我知，下次唔會啦，真係對唔住！
壹：咁喺千語面前唔會覺得尷尬咩？
馬：佢都唔係望住。
壹：但你知唔知咁係犯法㗎？
馬：我知呀，但嗰吓真係到咗一個極限，下次唔會㗎，平時都唔會咁㗎，成世人第一次。
另一主角千語 BB，見到老友露械相，相當好奇，仲放大張相，睇完又睇，兼且陰陰嘴笑。
吳：佢知㗎，我哋都知㗎！
壹：會唔會覺得尷尬呀？
吳：你應該要問佢呀！
壹：但你幫佢擋喎？
吳：你問吓佢，我哋覺得冇嘢嘅。
壹：怕唔怕男朋友介意呀？
吳：佢知㗎，我講咗俾佢知
至於啱啱做完騷的林峯，就早有準備，記者未開囗，已經爆笑話：「我知㗎喇！嗰日佢同我講，我已經話唔係急到咁呀？冇乜嘢嘅，我淨係覺得好好笑！」
日日放狗
去年因為胃酸倒流，千語 BB瘦到得番八十八磅，搞到林峯鬼咁心痛！要呵番 BB，林峯出動銀彈攻勢，一擲 6200萬買入薄扶林嘉林閣豪宅，正式同 BB住埋。由西環搬去薄扶林，千語 BB用五分鐘車程就去到數碼港公園。所以連日來，冇工開的千語 BB都帶住三隻愛犬到公園散步過日辰，見到相熟街坊，就停低吹水傾「湊狗經」，同行仲有兩個工人傍住，三個人三隻狗，一人 mark實一隻，包冇走甩！陪三隻狗仔放電一粒鐘，一行人就打道回府。
轉軚做歌手
年僅二十七歲的富二代馬天佑，是香港著名的星級形象指導，於英國倫敦時尚學院畢業，回港後即擲十萬創業，開設 Fame Glory製作公司，曾為金像獎及各大名牌任形象指導外，更與不少圈內歌手分屬好友，是不少天王天后如周杰倫、容祖兒、周柏豪、林峯等的御用形象設計師，除 styling外，馬天佑更多方面發展，出書、拍 MV，更加盟 A Music，由時裝界跳到樂壇。去年，新歌《倒數三秒》更邀得天后 Sammi破天荒擔任女主角。
觸犯法例
07年，林海峰與一班好友於西貢出海玩 wakeboard，人有三急貪方便的林海峰居然當眾露械，在碼頭旁向住大海小便。
根據「公眾潔淨及防止滋擾規例」，任何年滿十二歲以上人士，在沒有合理情況下，於街道、公眾地方或建築物的任何公用地方小便，即屬違法，初犯者須罰款$2,001-$5,000，而最高刑罰則為$25,000及監禁六個月。
撰文、攝影、攝錄：娛樂組
|
鍾意就快D Share啦！
|
|
|
