熱爆娛樂: iKON怪獸新人來襲 [壹週刊

2016年5月5日星期四

iKON怪獸新人來襲 [壹週刊 - 1365] __,M1,

iKON今年 1月開始舉行亞洲巡迴，每場都爆滿，「怪獸新人」並唔係浪得虛名， 5月終於巡到嚟香港！

娛樂偵訊

iKON怪獸新人來襲

挾住 BIGBANG師弟之名出道，韓國七人男子組合 iKON第一年已經囊括所有新人獎，被稱為「怪獸新人」！

不過韓國競爭激烈，一年之後銷聲匿跡嘅大有人在，唔想做一碟歌手，點樣 keep住個勢先係重點。 iKON今年開始舉行巡迴演唱會，仲開到嚟香港，即使票價直逼師兄，依然爆滿，七子話最重要係做好自己，用高質素嘅音樂留住歌迷！

少數服從多數

iKON由 7位成員組成，分別係金振煥、 B.I、 Bobby、宋允亨、具俊會、金東赫及鄭粲右，雖然稱唔上係花美男，不過佢哋都經過好長時間嘅練習生時期，加上喺選秀節目中有出色表現，先至行到出道呢一步，除咗有才華，運氣都相當重要。七個男孩終於一齊捱到出頭，培養出默契，人多好辦事嘅同時，總會有意見分歧：「我哋基本上無意見衝突，甚少嗌交。如果有意見，就會分為兩派，少數服從多數。不過總括嚟講，比起意見不合，成員嘅喜好比較相似，很合拍，當有不滿時，都係一齊不滿。真的遇上分歧時，就由年紀最大嘅振煥出來調停。」

iKON上年 10月喺首爾舉行演唱會，今年 1月開始《 SHOWTIME tour》，走訪日本、韓國及東南亞十多個城市， 5月 7號就係香港站，成員個個都非常期待：「好開心可以再次去香港，上次 MAMA的時候已經印象很深刻，希望今次大家可以更加熱情。」話晒第一次喺香港開騷， iKON話預備咗驚喜俾 fans，不過暫時唔可以透露，大家要拭目以待喇！

iKON七位成員（左起）宋允亨、 Bobby、 B.I、金振煥、金東赫、鄭粲右及具俊會，各具特色。

隊中人氣最高嘅 Bobby，喺隊中擔任 rapper，獲得高度評價。

19歲嘅 B.I，年紀小小就擔任隊長一職，接受訪問時表現成熟，係隊中嘅發言人。

挑戰綜藝儲人氣

YG旗下藝人甚有個人特色，作為最淺資歷嘅 iKON，睇住一眾師兄師姐嘅成功，難免有少少壓力：「大家對我哋嘅大碟有好嘅評價，我們會繼續努力，成為更出色嘅歌手。雖然壓力不小，不過唔會成為負擔，我哋擁有自己嘅特色，就係青春及新鮮感。」

識得喺綜藝節目上表現自己，形象就會更加入屋。早前 B.I同振煥就喺《瑪麗與我》中照顧小動物，愛心爆棚，佢哋話同幾位前輩級主持合作，喺佢哋身上偷師不少。其他成員一樣蠢蠢欲動，希望分一杯羮，允亨鍾意煮嘢食，希望做烹飪節目， Bobby就想上惡搞節目《 SNL Korea》，演搞笑趣劇可以鍛鍊演技。七位成員各有定位，唔會相撞，分工合作自然力量更大！