51歲嘅美魔女羅霖將會拍大台劇，埋位嘅前夕，有《蘋果》讀者透過「爆相爆片」發現羅霖帶咗囝囝Jonathan同J君去咗泰國旅行，J君全程對羅霖母子照顧有加，似乎成功融入家中，再婚有望！啱啱返香港嘅羅霖，噚晚接受《蘋果》訪問，講到同行男子嘅身份，佢大方直認係J君：「係呀，原本只同Jonathan去曼谷，因為嚟緊要拍劇，可能有半年都陪唔到佢出去旅行，所以咪出去玩幾日，點知J君知道都話一齊去，我覺得冇乜問題，所以咪俾佢一齊去！」問到佢哋係唔係同房，羅霖話：「我同J君係分兩間房住，佢仲好有紳士風度，全程照顧我哋兩母子，男人應該幫我拎野。」羅霖仲話Jonathan唔係第一次見J君：「之前話喺年尾安排佢哋見面，今次係佢哋第一次去旅行，我冇專登問Jonathan鍾唔鍾意J君，不過佢哋相處得好好。」佢又話：「佢係比較好嘅朋友，不過0依家工作為先，努力工作為三個仔，感情嘅嘢遲啲先講，唔好提太多，我通常講得出做得到。」講到今次三人行，又會唔會有避忌？羅霖話：「我又唔覺得有乜嘢要避忌，偷偷摸摸好辛苦，不如大大方方，況且我又單身，佢又單身，最緊要暫時都係好朋友階段，仲未係諗定佢，所以冇需要避忌。旅行最緊要開心，我同J君都好專心照顧Jonathan，希望佢玩得開心。」之前羅霖話過見過J君嘅爹哋媽咪，唔知下一步又會唔會安排見自己嘅爹哋媽咪呢？羅霖笑笑口話：「爹哋媽咪未諗過，因為拍完劇先再諗自己任何私人嘢，暫時專心拍劇。」另一方面，讀者話見到羅霖喺機場排隊退稅，似乎收獲都好豐富，佢話：「退稅好普通，唔一定大數目先可以退稅，家庭主婦精打細算，有得退梗係退，今次我主要買Jonathan啲嘢，好似衫、玩具同卡，反而我自己冇乜嘢買，加上時間短，大部份時間都係陪Jonathan去好多地方玩，shopping時間唔多，都係同一間百貨公司，方便退稅，如果自己shopping，都係去歐洲shopping，不過今年拍劇冇時間。」至於有冇買內衣褲，羅霖話：「冇呀，我知道有好多人去泰國都買內衣褲，覺得平，wacoal、黛安芬，我以前有試過買，不過真係同香港size唔同，唔需要嘥錢去買。」
|
鍾意就快D Share啦！
|
|
|