金錢一向係冧女必殺武器，不過呢個伎倆可能因為張繼聰而改變。最近Nuts哥身邊不少紅顏知己都心心眼咁話「恨有阿聰做老公」！除咗因為佢擁有「威而鋼」嘅body，亦被佢嘅真情所感動，皆因阿聰喺1月20日凌晨喺社交網「向全世界說愛Kay」，發表慶祝錫婚嘅愛的宣言，冧暈大肚Kay就梗㗎啦，仲令一街港女成地「葡萄」，酸到流晒口水。
阿聰段冧老婆宣言係咁寫嘅：「感謝成為我的妻子及最好嘅朋友。晃眼十年因為有你同行，就算走過高山低谷，我覺得沿途風光明媚。能夠有如此靈魂伴侶，讓這趟地球之旅變得幸福圓滿……」嘩！真係冧到呢！我Nuts哥自問集韓國熱爆劇《鬼怪》兩位男主角孔侑加李東旭嘅外表同埋情深，不過講到冧女手段喇喎，Nuts哥都甘拜下風，真係要跪求阿聰過兩招嚟傍吓身。
「B餐」暖男最搶手
或者有啲拜金港女會藐：「唓！暖男有乜用吖！唔會有情飲水飽。」冇錯，可能有啲女仔覺得日日買名牌、搭直升機去high tea、有保鏢跟出跟入好似好威，但係畀個有錢佬同你一齊咁又點啫？得閒公開數吓你、揭吓家醜咁，你估好過癮咩！雖然我唔知Kay飲阿聰啲水係咪會飽，不過做咗張太成十年都依然索爆，就知佢生活好愜意如果Nuts哥係女畀我揀，「A餐」用幾十萬買個A1廣告向我示愛賀壽，「B餐」就零消費喺社交網感激我陪佢「走過高山低谷」，我一定會揀「B餐」囉！唔係扮清高，只係嫌有啲人太銅臭啫！
「B餐」聰唔單止令你warm，佢嘅不死上進心同無敵EQ，亦叫不少雄赳赳嘅猛男為之「欽敬」！阿聰話「就算走過高山低谷，我覺得沿途風光明媚」，相信都係講緊當年婚後，天后老婆嘅事業發展將佢遠遠拋離，阿聰慘成網民圍攻嘅地底泥，無限不堪入耳嘅稱呼「廢柴老公」、「謝繼聰」等盡出，「樽鹽」半粒都冇剩，阿聰亦因為輿論壓力而患上抑鬱症，好彩佢最後都諗通咗，更加將自己嘅EQ提升到極致！記得當年Kay同陳奕迅傳緋聞，阿聰為妻護航拋金句：「我比我太太更愛陳奕迅！」一招以力打力，更加顯出佢對老婆嘅愛同風度。雖然阿聰喺口誅筆伐下成長，但佢喺不對嘅時間遇上對的人，而Kay亦將「女人最大嘅成就，就係成就老公」嘅賢妻本色發揮得淋漓盡致，兩公婆就係咁樣攜手捱過低谷，走上高山。
「震波猜枚」技驚四座
機會只係留畀有準備的人。喺老婆力撐之下，阿聰從來冇放軟手腳，一直努力裝備自己，由一支針咁嘅「廢柴」身形，練成鐵柱咁堅挺嘅爆肌胴體，42吋「胸器」、8舊腹肌加埋麒麟臂！結果冇呃你，上帝閂咗道門都會留番個窗畀你！阿聰就喺2013年接拍無綫劇《老表，你好嘢》飾演軟飯王「潮潮」人氣急升，翌年喺《老表，你好hea！》一幕「震波猜枚」更是技驚四座，成功洗霉底，同年喺無綫頒獎禮奪得「飛躍進步男藝員」，由網民口中嘅「瘟神」變成「男神」！
今時唔同往日，Kay依家佗住個女，阿聰一力擔起頭家，依家粉絲見到Kay，只識叫：「呢個咪張繼聰老婆！」
|
鍾意就快D Share啦！
|
|
|