娛樂偵訊
林作媽專訪 王莉妮：靠雙手撐起成頭家
十優港姐麥明詩跟前大狀男友林作去年九月分手，兜兜轉轉，早已成為半個娛圈人的林作，月初突然宣布放棄做大律師，轉行做補習天王（簽遵理十年）、拍戲等。不按牌理出牌，原來背後一手栽培他的林媽媽王莉妮也不簡單，林作 89年出世，一個女人月入三千蚊撐起成頭家，到現在擁有過億物業成環保、地產公司老闆，她說都是靠自己一雙手打拼出來。
擁過億物業
林作媽投資眼光準，出手快，去年四月地產巿道低迷，她一擲六千三百多萬購入麥當勞道複式單位，相隔一年，升值接近千萬。連同在港投資另外三個物業，林作媽擁過億物業：「業主放盤兩日，就俾我執（買）咗，依家銀行評估去到七千二百幾萬。」她說。
但三千五百呎新屋，林作媽只花了三十萬在淘寶買傢俬，慳字行先早已訓練有素。
「林作出世時，我仲係打工仔，一個月搵緊三千幾蚊，好低人工，買奶粉錢都唔夠，當時冇錢經濟好緊張。放工就會周圍睇吓邊度有平菜買，林作三歲之後，我就出嚟搵機會賺錢，因為想搵多啲錢送佢入好嘅國際學校。」林作媽說。
搏盡買原始股
做生意眼光獨到，也要膽識配合。買股票搵到第一桶金。九○年底，深圳證券交易所開通，她買了大批原始股。
「我炒股票，買咗好多原始股，嗰時只係一張紙，其實好唔健全，嗰張紙未託管又未上巿，不過一上巿，就升成二十幾三十倍。一蚊一股，好似深圳發展銀行，一張紙買返嚟，一上巿升到五十幾蚊。」林作媽說當年為搵錢搏到盡。
打官司七年
有本錢後，她變得更加積極。林作四歲以後，她單人匹馬跑遍東北三省，孭住背囊四出搵生意。名下的美善集團，經營地產、環保業務，一三年，又跟楊海成旗下的實德環球合作，生意愈做愈大。
「我喺內地會做不良投資生意，即收爛尾樓，上落都好大，喺物業投資方面，我都睇得幾準。不過唔係鋪鋪贏，早年做過一單房地產生意，啲合伙人勾心鬥角，到依家仲打緊官司，啲錢扣晒喺度。單官司打咗成六、七年都未完，所以都幾辛苦。」林作媽說自己好勝，但並非每次都是贏家。
林作支持離婚
林作媽形容前夫「唔係好搵到錢」，但一家書香世代是文化人，林作讀書叻遺傳自父親：「我哋兩個人最初關係幾好，到阿 Joe十五歲已經唔得。阿 Joe話我哋為佢而夾硬喺埋一齊，到十九歲，連佢都支持我同老豆離婚。不過老豆好錫阿 Joe，入哈羅、攞到獎學金同考入牛津，都因為老豆喺身邊支持。佢哋兩父子仲有聯繫，個仔有咁嘅成績，佢都好驕傲。」
悉心栽培林作，名牌哈羅中學學費每年接近七十萬，林作媽自言搵錢未敢鬆懈。她回憶靠雙手打拼天下日子：「以前交通好唔方便，搭完火車又要搭船，搵食好艱難，一個人周圍去，一餐飽一餐餓，所以我哋冇咩背景，都係白手興家。阿 Joe欣賞我唔靠人能夠有今日，佢身邊好多同學都有背景，阿爺阿嫲留好多（錢）俾佢哋。」
要求「三個叻」
母子倆相處似朋友，她從小給林作空間自由發揮，但最好達到「三個叻」要求，她說：「讀書要叻、搵錢要叻，溝女都要叻；搵女朋友尤其唔可以是但，要有條件，起碼係優質，第日子孫先聰明，呢啲遺傳基因好緊要。」提到外間指林作放棄大律師「嘥咗」，林作媽認為人生應活得精采，本來投反對票的她，最後也認同林作看法：「特朗普（美國總統）、邱吉爾（前英國首相）都涉足過娛樂圈、媒體；約翰遜（前倫敦巿巿長）甚至做過記者，都係多元化發展，好多偉人都行過呢啲路，阿 Joe話自己算係咩，依家先得廿幾歲，咩都要試吓。」
過億物業
由三千幾元月薪，到現在擁有過億物業的王莉妮，憑智慧、懂得把握機會，炒股票而獲得第一桶金，再作適當的投資錢滾錢，是位成功的生意人。王莉妮分別是祥豐有限公司及深圳善美集團的股東之一，公司主要業務是房地產投資、廣告、環保科技及農業技術開發等工作。
2011年
以 3050萬購入中環半山麥當勞道 98號嘉年大廈其中一單位給林作自住，現在市值 4000萬。
撰文、攝影、攝錄：娛樂組
|
鍾意就快D Share啦！
|
|
|