現年50歲的演員姜皓文（黑仔）不知入覺入行已30年，亞視出身的他由電視演到電影，渾身是戲的他今年獲金像獎方面肯定，首度獲提名「最佳男配角」，將與曾志偉、秦沛、吳孟達以及廖啟智等人爭獎。
演齡30的黑仔演過各類型角色，亦曾因為入戲太深而令情緒受影響，更而影響到日常生活，就如影帝張家輝一樣亦曾有過情緒病，黑仔表示：「其實呢幾年老婆（金慧英）成日叫我睇醫生（心理醫生），初初我以為佢講笑，但佢次次都好認真講。我就會諗，其實近呢十年，我都幾歇斯底里，少少事都會扯火得好緊張，尤其係揸車嘅時候，好躁，試過用車閘住部亂揸車嘅的士，我有種忍無可忍嘅感覺，係老婆係咁撳住我，但我都有落車鬧個司機。」黑仔意識到出現問題，不過就未有找醫生，而用一些想法、意志去調整自己，他表示：「我成日要諗，如果我有咩事，我屋企、太太會好麻煩，一諗到咁就會熄火，都算控制到。」
「入紙」生B被「彈紙」
不過姜皓文都有鐵漢都有柔情的一面，講到演戲對黑仔的其他影響，近年演過不少父親角色的他，笑言亦因此令他有生B念頭。
他與太太金慧英結婚至今18個年頭，二人一直未有計劃生B。黑仔坦言曾有意向太太「入紙生B」，可惜被「彈紙」，他笑言：「其實我拍過咁多戲，好多戲都係有女兒嘅爸爸，唔知係咪外父相，不過，女兒真係好窩心，好多拍完戲都會寫張咭畀我，令我都幾想生番個女，但我老婆無應承，而大家諗吓諗吓亦打消念頭。」黑仔繼續與太太享受二人世界，他感觸表示能夠活躍幕前演出，有賴太太一直在背後默默支持，笑言現階段希望能買間海景大屋，答謝太太。
捱窮的日子
當年剛剛加入亞視的黑仔，每月只有幾千元人工，他說：「係窮到連屋租都唔夠錢交，要成日避開個包租婆，最後係避到佢忍無可忍，Lock咗我度門，搞到要漏夜返去執返啲野，再要搵地方住。」
黑仔亦演出過不少動作戲，他直言身為演員，受傷亦是在所難免：「尤其係男演員，受傷真係好難避免，但係自己冇乜所謂，因為真係好鍾意演戲。近年最難忘係拍《殺破狼2》，同吳京由三樓跳落地下，因為導演要求好高，前後跳咗7次。我本身都唔怕高，但跳咁多次後尾都開始怯喇，怕咁樣繼續跳會出事，好彩最後冇事。另一次係前幾年內地拍《盜墓筆記》，因為個景有好多手造嘅機關，結果畀木棍打中左眼受傷，差啲爆眼球，即時疼咗一大片，不過為免影響進度只可以忍痛拍攝，好難忘。黑仔又重申不介意受傷，認為是身為演員的經歷。
|
鍾意就快D Share啦！
|
|
|