【《蘋果》專訪】
解約孖老公唐文龍開餐廳
劉永健數無綫無禮無情
成功不一定可以靠父幹，現年45歲的劉永健是劉家榮兒子、劉家良姪仔，但多年來未有任何依靠，在無綫打滾多年，不斷演奸角及二世祖角色，意興闌珊的他07年終決心離開無綫，北上發展自己事業，近年更與曾經跟他傳「hehe」的好兄弟唐文龍夾份投資開餐廳。他對無綫既愛且恨，感激是它帶給自己名氣；失望，是他得不到應有的尊重，戲份又經常被刪減。
劉永健嘆在無綫多年，覺得完全不被尊重，所以毅然解約北上發展。攝影：沈健程
劉永健於96年入行、在無綫打滾逾十年，是御用奸角，殺人兇手、二世祖、公子哥兒及小混混也統統做過，多年來一直聽命公司安排，堅守演員的自我修養，他說：「或者做主角係每個演員嘅目標，但對於某些演員，贏到一份尊重比起大紅大紫更加珍貴。」
半年冇收入還騷
過去十年，劉永健三度對無綫感到失望，意興闌珊下，他07年終於下定決心離開，北上發展自己事業。劉永健日前與合資開餐廳的好友唐文龍於灣仔接受本報專訪，劉永健提到01年被無綫逼還騷以致半年沒收入，他說：「每一年譬如我簽78個騷，可能今年做得50個，剩番28個。基本上，合約係冇寫到我要還，但佢（無綫高層）就要我延半年約去還騷。半年冇人工其實都好困難，佢同我講咗一句說話：『你都唔志在你爸爸劉家榮，你咪返屋企問爸爸攞錢囉！』」其後又於劇集《衝上雲霄》及《師奶兵團》被半呃半𠱁安排做閒角，加上戲份又經常被刪減，他感到不受尊重，最終決定解約北上發展。
劉永健回顧在無綫的光陰，笑言覺得自己最戇居是沒有靠關係：「狄龍uncle曾經問過我一句，佢話你使唔使我同方小姐（方逸華）同六叔（邵逸夫）講，話劉家榮個仔𠵱家喺TVB入面？我話唔使，我靠自己！」劉永健撇無綫後，慶幸在生意上的收入比留無綫還要多，他說：「其實我冇停過拍戲，只不過我唔喺香港咋嘛，我啱啱先喺徐州、上海拍完戲返嚟。𠵱家我有餐廳、有自己服裝品牌、 有網上電子商業嘅渠道。」
【武術世家】劉永健的父親是劉家榮，與大伯劉家良及伯娘翁靜晶一家感情要好。
【Hehe情緣】唐文龍（左）與劉永健老友鬼鬼，二人現合作投資做飲食生意。
【御用奸仔】劉永健在無綫多演反派，曾在《十月初五的月光》演劉丹的二世祖兒子。劇照
感激唐文龍借錢
劉永健除了「多謝」無綫令他闖出新血路，還感激曾經與自己傳「hehe」的唐文龍，笑言叫他做老公，又讚是暖男，劉永健笑說：「我鍾意大隻啦，有胸肌啦，有鬍鬚啦，最緊要陪我去超級市場！」身旁的唐文龍即謂：「我鍾意身材好，白雪雪同埋後生囉！不過我鍾意女人，你就鍾意男人吖嘛！」之後劉永健正經說：「好多謝佢，當時喺內地唔係太好，佢留個訊息畀我，話留咗罐奶粉叫我去攞，因為我哋玩健身會飲奶粉，一打開就有一萬蚊人民幣。大家男人佢知道我乜環境，知道我唔開口，直接畀我又唔會要，呢個真係好好兄弟。」唐文龍即拍拍老友膊頭，表示一切在心中。
採訪：嵐山、馮國康、趙永傑
攝影：馮峰、卓振輝、沈健程
場地提供：昭和食堂
|
鍾意就快D Share啦！
|
|
|
