恭喜晒！
歌手林奕匡（Phil）出席環保大獎頒獎典禮，講到昨日他在網上宣布求婚成功，他開心表示：「其實計劃咗好耐，上年年頭已經開始諗同睇定戒指，女友都講過話如果求婚佢唔感動到喊唔會應承。」他謂曾想過幾個求婚方法，但覺得女友會嫌演唱會上求婚沒誠意，而九年多前跟女友剛拍拖時一起到澳門玩：「嗰時我哋去咗大三巴，我抱佢上去，但去唔到頂，太熱，差啲氣絕身亡，自己又唔夠strong，但女友講過嗰次係人生中做過最浪漫嘅事，所以我想重演呢件事，今次我呃佢話想去澳門玩，計劃抱佢上去求婚。」
差啲被女友識穿
他又笑言期間差些被女友識穿：「佢約咗朋友食lunch，我就趁呢段時間去花店攞花同攞咪，但點知佢突然打嚟話唔記得帶銀包，但我去緊攞花，所以番轉頭救佢，佢就覺得奇，話我唔係喺樓下食飯㗎咩，但最終佢都冇識穿。」他表示今次再抱番女友行上去大三巴，今次終於成功，求婚時亦有準備戒指、花及跪地，問到戒指多少卡？他笑言：「開心卡，呢啲唔使講咁多。」問到女友可有感動到喊？他笑言：「佢有眼濕濕，但佢嗰陣太亂，尋晚番到屋企佢先大喊，不過開心嘅，我放下心頭大石，幾多晚瞓唔着。」他亦謂求婚時安排了兩位生面口的朋友扮自拍幫他們影相留念。問到求婚成功可有開party慶祝？他謂剛剛先開完很多party。
女友全權籌備婚禮
講到婚禮，他謂九月會在溫哥華舉行，笑言交給女友籌備：「我已經做咗最難嗰part。（會唔會返香港擺酒？）應該會，預計香港會請多啲人過加拿大。（同都係今年結婚嘅陳柏宇交流結婚？）大家唔同，佢喺香港搞。（怕唔怕搞結婚同女友意見不合？）唔會，畀晒佢話事，佢想我配合都ok。」問到婚後可會先過二人世界定想生B？他謂：「睇吓點，順其自然，應該會有少少二人世界先。」
來源 source: http://hk.on.cc
|
鍾意就快D Share啦！
|
|
|
