無綫熱播劇《迷》進入結局篇，劇情愈嚟愈緊湊，一班觀眾除咗留意劇情之外，當然仲有視后田蕊妮（阿田）嘅超班演技日前劇情講到阿田得知愛女被殺後，演繹連場崩潰爆喊戲，誇張到連眼睫毛都有戲，令一班觀眾睇到心酸，又為佢嘅演出拍爛手掌。話明係視后，演技又點會局限於喊戲先，阿田仲會慢慢成魔，挑戰冷血奸角，網友都忍唔住話：「唔睇會走寶呀！」
設計殺死「殺女兇手」
無綫官方FACEBOOK專頁「myTV SUPER」亦特別剪輯咗短片，片中痛失愛女嘅阿田重新收拾心情，開始展開復仇大計，最終走向成魔之路。而成魔嘅阿田設計殺死「殺女兇手」，令對方刀插心口倒地，對方明知就快死，仍苦苦哀求阿田，不過阿田依然唔放過佢，仲放狠話：「上天唔畀你死，要你等埋我，等我親手幫個女報仇。」之後佢利用微波爐製造爆炸殺人滅口，眼見自己成功報仇，阿田突然又笑又喊癲到爆，睇到人勁心寒！最心寒係阿田殺完人依然好冷靜，事後唔單止若無其事地下廚，仲同其他人開心傾偈，好似上一秒冇殺過人咁，相當嚇人！
冷血表情令人心寒
雖然劇中全程冇見血，但網友睇見阿田嘅冷血表情，紛紛大呼好恐怖又心寒，仲話呢種心寒係由頭寒到落腳，簡直同睇鬼故冇分別。一班網友亦大讚阿田演技冇得彈，既演活好媽媽嘅角色，又做到冷血奸角，無論表情定情緒都完全投入呢個冷血角色，時時刻刻都KEEP住咁癲，呢啲咪係視后級演技囉！另外，有網友仲發揮無限聯想，指阿田個角色同郭晉安喺上年台慶劇《致命復活》嘅角色好似，兩者都係因復仇而漸漸成魔，失去自己本性，難怪佢哋都笑言阿田係「女版郭晉安」！
網民有話兒：
XXXlandNg：Cal姐嘅眼神真係一流，睇到人好心寒，唔睇會走寶呀！
KelXXXi：這就是真正視后級演技！
XXngLamYinXX：又係行上復仇之路，仲唔係女版郭晉安？
KathyTXXX：殺完人，仲可以開開心心咁煮飯食，冷靜成咁，真係成魔了。
李X仁：今集劇情癲，阿田嘅演技仲癲，癲到不得了！
|
鍾意就快D Share啦！
|
|
|
