50歲陳雅倫(Ellen)與吳彥祖表哥Martin拍拖半年，2月宣佈男方已求婚，點知戀情見光即出事，陳雅倫不時喺社交網暗示感情有變，傳出同未婚夫感情亮紅燈，陳雅倫亦呻過冇「信任」關係便完了!陳雅倫今日終於喺facebook直認與Martin分咗手，其後接受《蘋果》電話訪問話，佢就話拍拖以嚟，先後5次飛「呢個人」，佢坦言：「每次分手佢都會甜言蜜語死(舌累)，不過今次真係冇得講。上星期佢話自己病，病足6日，街都出唔到。原本約咗星期六我返香港見面，點知佢嗰日失蹤咗24小時，電話唔聽搵唔到佢。佢事後解釋仲好笑，話自己嘔血，驚有事去咗醫院照X光，又話自己失聲，所以冇打俾我。我話『黃生，唔好玩啦，大家成年人，你自己做過乜嘢心知肚明』，噚日同佢分咗手。」Ellen又話Martin嘅「死罪」，包括情人節同生日都冇現身，佢話：「戀愛係盲目，熱戀緊嘅時候，梗係乜嘢缺點都睇唔到，冷靜咗之後咪清醒囉。我都有線眼，我生日、情人節佢去咗邊，好在有狗仔隊，有圖有真相，我真係要多謝狗仔隊，幫我睇住晒，所以我拍拖，好放心。」據知陳雅倫生日，未婚夫冇陪佢過，反而獨自去夜蒲，唔怪之得，咁嬲嬲要分手。
來源 source: http://s.nextmedia.com
|
鍾意就快D Share啦！
|
|
|
