對於屈穎妍質疑，小市民點解都識搵戴啟思或某幾個大狀，蔡騏解釋，因為事務律師都清楚邊個大狀熟悉 JR案，搵番同一個大狀去做，係好常見嘅情況。（《蘋果日報》圖片）
八卦陣
反擊屈穎妍 法界男神：法援案收費打六折
出名愛國撐警嘅專欄作家屈穎妍，支持政府嘅手法真係層出不窮。話說早排佢喺報章寫咗篇「搵食兵團」，投訴經常幫小市民打司法覆核（ JR）案件嘅大狀，靠納稅人嘅錢養肥，話因為官司費都係法援資助，所以呢啲「政治官司」就幫呢批狀師兵團搵唔少錢。
講到打 JR咁好搵，《壹》仔搵法政匯思召集人蔡騏嚟解畫：「我哋業界裡面嘅大律師，尤其是佢哋咁出名，做法援 case嘅話對比番佢哋平時收嘅費用，其實已經俾咗好大折頭。所以我自己就唔覺得呢啲法援嘅 case係養肥咗佢哋，或者（大律師）靠法援去生活。」
大律師同事務律師接到法援 case，一般都會收平三、四成嘅費用，同打民事案相比，其實搵少好多就真。俾屈女士開名鬧嘅資深大律師戴啟思受訪時強調，毋須評論屈穎妍嘅言論，佢話大律師都有行規，好似的士司機唔應該拒載咁，一般唔會拒絕委託人，更加唔會因為勝算低就唔接 case。
遼寧號訪港 見證中共謊言
由前蘇聯航空母艦改裝而成、中國第一艘航母「遼寧號」訪港五日，唔少愛國人士同中國網民，以為呢隻船係國家強大象徵，二千名持參觀券市民湧上船參觀，冒雨拍攝國產殲 15戰機，欣賞最先進嘅二手科技，感動自豪一番。
以為「遼寧號」有幾咁先進，其實有少少軍事知識嘅人都知，佢比外國航母落後起碼二十至三十年，加上印度同巴西等嘅第三世界國家，一早向西方國家或者俄國購買二手航母改裝，唔少設備更加精良，示強定示弱，不言而喻。
「遼寧號」唔及核動力航母，並無近乎無限嘅續航力，要花三千幾萬燃油費先可以來港展示「軍力」，最終反而擾民。本地渡輪遇着強國航母要讓路，連累梅窩市民返工遲到；「遼寧號」使用唔合規格燃油，喺交椅洲以北海域狂噴黑煙，令葵涌地區二氧化硫濃度倍升，污染空氣。但因為係軍艦，環保署都無佢符。
順帶一提，港商徐增平九八年透過香港創律集團，用二千萬美金投得「遼寧號」（當時叫「瓦良格號」），聲稱改裝成賭船，最終拖到大連由中共改裝成航母。徐兄長徐增順曾承認賭船只係幌子，一開始就係為中國買航母。由購買、改裝到展示，一切都係謊言。
又開片 侯強鬧爆簡 Sir死霸物業
記者最近行經上水，撞正鄉事委員會主席侯志強好鬼㷫，捉住記者狂鬧簡炳墀。原來位於上水新功街二號嘅物業係鄉事會擁有，五十年代由一班村民夾錢興建（侯強估價現值八千萬）。當年定咗規矩，物業管理權交由當屆正副主席，卸任後需轉名俾下任主席，運作五十年都冇問題。
點知，到二○○三年簡 Sir無法連任主席後，竟然賴貓堅拒轉名。「有時做人唔怕你惡，最怕你賴皮。你無法積福俾後代，後代俾人指指點點，做人要光明磊落，唔好偷雞摸狗，就算轉到名俾個仔，你都唔好要」侯強狂轟。
早前物業簷篷石屎剝落擊傷途人，收到告票，簡 Sir又唔肯負責，最後搵律師安排賠償。侯強好激氣咁話：「佢夠膽就賣咗佢，我到時睇吓佢點，不過如果人窮時候就冇計。」句句有骨。記者搵簡 Sir回應，佢一聽條問題就情緒激動手指指，仲用粗口問候：「關你咩事，我當年捐咗幾百萬俾鄉議局你又知咩？」
特首英文比併 林鄭平穩 689較自然
做得特首，英文唔可以差，唔係俾人用英文問嘢又唔識答，就失禮死人。林鄭同 689都去過英國讀書，佢哋啲英文又係咪「嘞嘞聲」呢？《壹》仔將林鄭上星期出席一個國際法研討會嘅演講，同 689兩年前出席博鰲亞洲論壇嘅演講，交俾轉行做英文補習天王嘅林作聽過。
林作覺得林鄭文法掌握好好，雖然發音有啲「港味」，某啲字都有懶音，但整體冇大問題。佢又話林鄭發言一向冷靜沉穩，唔會有窒位，但語氣略嫌平淡同悶，只係讀稿，唔似一啲出色嘅演講家，會即席爆肚，林鄭呢種唔會跳出講稿框框嘅作風，亦係香港官員嘅習慣。
至於試過將「三司會」講成「 Three C Meeting」嘅 689，林作認為以佢嘅年紀，英文口音同表達上有老式英文感覺，雖然冇林鄭咁順暢，但讀稿 feel冇咁重，相對自然同舒服啲。話雖如此，林作都不忘抽擊 689，話佢接受訪問時十問九唔答，兜嚟兜去，強調演講嘅表現唔係語言能力嘅全部。
撰文：巫不言
news@nextdigital.com.hk
|
鍾意就快D Share啦！
|
|
|