坦白講
月入$6000都夠使
老師說過，香港早已無田耕。小時候寫我的志願，不是醫生、就是律師。
二十五歲的馮家樂，一次機會，接觸到馬寶寶社區農場，發現原來農夫不只是一份職業，更是一份專業。他決定當全職農夫，賣自己種的蔬果，預計月入六千蚊。
賺得少，他要放棄不必要的消費。但在田園裡的一切，比物質帶給他的，更有滿足感。
原來米會因為天氣太熱染上稻熱病、害蟲福壽螺有唔同方法抑制。原來耕田，並唔係只靠蠻力，而係用個腦。
三年前一個夏令營，有人同我講佢打兩份工，其中一份就係做農夫。好奇心驅使下，我跟佢去馬寶寶社區農場。記得有一日食完龍眼，我拎住果殼同核問農場成員，呢啲垃圾要掉喺邊？對方糾正我，呢啲係可以循環再用嘅廚餘，並唔係垃圾。我嗰一刻好震驚，原來城市人眼中一文不值嘅垃圾，交喺農夫手中，會轉化成新生命。
嗰個暑假，我一整日對住一大片農田、呼吸住新鮮空氣，幫手灌溉、除草同收割，生活又簡單又舒服。可能係農場種出嚟嘅蔬果實在太好食，我對耕種亦開始產生興趣。
大專畢業後，見元朗嘅新興農場招募義工幫手耕種，所以報名參加。以前喺馬寶寶只係幫手，工作唔算辛苦，喺呢度要犁田、播種、施肥。新手上場總係經常碰釘，我試過耕田耕到體力透支，俾蚊蟲咬到皮膚敏感，但依家我都習慣晒。
做咗學農三個月，有千幾蚊收入，過多一排有收成後，將自己種嘅蔬果賣出估計會有六千蚊。因為收入唔多，我冇得再買新遊戲機，出街食飯唱 K可免則免，盡量自己煮飯食。可能你會覺得呢種生活好艱苦，但我覺得透過有機耕種，種到健康好味嘅農作物俾香港人食，比起賺一大筆錢，更有意義同更開心。
喺香港所謂好工，即等於搵到錢，人生仲有冇其他可能性？由細到大，我可以選擇嘅根本唔多，學校揀科只得文理商，大人期望你將來唔係做醫生就係做律師。以前我根本冇諗過，原來仲可以做農夫。
屋企人俾我一年時間去試全職耕種，但我冇同佢哋講，我決定以全職農夫為我終身事業。希望呢一年，可以證明到喺香港發展農業嘅可能性，年輕人喺香港耕田有希望。
撰文：戴晴曦
攝影：胡智堅
news@nextdigital.com.hk
|
鍾意就快D Share啦！
|
|
|