坐咗成粒鐘車先返到學校，落車時 Aiden呆呆滯滯，冇晒心機。
探熱針
來回車程兩粒鐘 陳豪大仔讀半山冷門幼稚園
生產力超強的陳豪、陳茵媺夫婦，婚後三年抱三，大仔陳梓燁（ Aiden）眨吓眼三歲，夠秤升 K1，之前有傳兩公婆為谷阿仔做數學天才，幫佢報讀偏門猶太教國際學校。據知 Aiden其實係入讀位於猶太學校隔籬的「幼童樂團協會幼兒園」。
最近身兼母職的陳豪，日日負責湊阿仔返學，上週四開學日，兩父子由大埔寓所到半山，坐足成粒鐘車。返到學校，阿仔已經呆呆滯滯，要爸爸半拖半拉先肯入課室，真係睇見都戥佢攰呀！
鍾情活動教學
學位爭崩頭，為咗囝囝可以入讀心儀學校，陳豪夫婦大包圍，去年開始四出到各大國際學校叩門，當中包括有「首相搖籃」之稱的哈羅香港國際學校，仲有深受名人熱捧的加拿大國際學校，經一輪篩選，兩老婆最終安排囝囝入讀位於半山波老道的「幼童樂園人協會幼兒園」。
「之前有報導話佢哋要谷個仔做天才，所以讀猶太教學校，其實佢哋就係唔想谷啲仔女，想佢哋輕鬆啲，而家讀呢間幼稚園雖然唔係一條龍，但佢哋 buy佢係活動教學同冇功課壓力，等佢讀完幼稚園，先慢慢再幫佢搵國際學校。」陳茵媺身邊人透露。
唔揀名牌學校
Aiden入讀的幼稚園，雖然並非名牌學校，學費亦唔算特別貴，$48,400一年，不過學校堅持用小班教學，每班只有十至十五個小朋友，全英語教學，最緊要係學校採用英國「兒童啟蒙階段學習」（ Early Years Foundation stage）課程，主攻讀寫能力、溝通、體能、數學同社交等七大學習領域，加上活動教學，而且甚少功課，真正「寓學習於遊戲」。
保安嚴密
為了阿仔可以愉快學習，兩公婆日日長途跋涉都冇所謂，計一計數，由陳宅位於大埔比華利山寓所返到學校，來回車程起碼兩粒鐘，不過陳豪同陳茵媺都堅持每日親自接送。
阿爸阿媽用心良苦，不過 Aiden似乎唔多領情。最近 Aimee復出拍新戲《日月星》，湊仔重任交晒俾老公。上週四（二十四日）學校開學日，陳豪單拖湊仔返學，現場所見，學校保安非常嚴密，不時有外籍保安員巡邏之餘，有陌生車輛停泊在學校附近，保安員更會用警察專用的「車底檢測鏡」檢測車上是否藏有爆炸品，認真大陣仗！
唔願返學
上晝九點，陳豪揸車載住 Aiden到達學校，坐完成粒鐘長途車， Aiden已經攰到冇晒心機，呆呆滯滯！泊車後，陳豪拉住阿仔上斜路，阿爸心急一直睇錶，但孭住大大個書包的 Aiden就愈行愈慢，書包仲要冇拉拉鏈。臨到學校門囗， Aiden開始兩隻手扯住爸爸，唔肯行入學校，最後陳豪又拉又氹，終於成功送阿仔入課室，自己揸車離開。
冷門學校
位於半山的幼童樂園協會幼兒園， 79年創校，歷史悠久，為區內一間小型非牟利學校，學校校風優良，被一眾家長評級為 8.5分以上，學校主要以小班教學為主，師生比例 1:8，老師來自不同國家，鼓勵自主教學，小朋友從遊戲中培養學習的樂趣，全年學費$48,400，相比其他名牌學校平一半。
另一例子，天后陳慧琳兒子「蝦餃仔」劉昇，亦同樣放棄名牌學校，現於荔景宣道會劉平齋紀念國際學校就讀小二，學校同樣實行小班教學，每班只收約 18個學生，老師更能照顧學生需要，全年學費約 10萬元，相對不少國際學校算是平民價。
撰文、攝影、攝錄：娛樂組
|
鍾意就快D Share啦！
|
|
|