前有線主播陳貝兒（Janis）驚爆同結婚6年嘅商人黃國棟離婚，有周刊報道話佢今年5、6月拍大台節目《嫁到這世界邊端》，喺鏡頭前係咁喊，事後同咗一個相熟嘅幕後講，話已經同老公分咗居，兼搞緊離婚。Janis稱係因為性格不合，相處有問題先分開，完全唔關第三者事，大家仍然係朋友(新聞連結：http://bit.ly/2xMlTZ5)。
離婚消息曝光後，Janis今日首度現身出席活動，佢喺台上分享拍攝情況，講到喺阿聯酋拍攝遭當地女性恐嚇，Janis苦笑謂：「o依家無論生死都冇人理，我離咗婚！」之後佢睇到自己嘅錄影片段，一度感觸落淚，要行埋一邊攞紙巾抺眼淚，活動完咗差唔多10分鐘，平伏心情先可以接訪問。
Janis話多謝大家嘅關心，離婚係舊年決定嘅事，本來o依家嘅心情恢復得7788，但係睇完預告片，勾起咗唔少回憶，可能因為呢個原因，Janis被問到婚變有否涉及第三者嘅時候，最初佢都好平靜話冇第三者，大家係喺和平氣氛下有共識，離婚程序喺度進行中，但係講到邊個提出離婚，Janis開始激動話：「唔會有人結婚之後就想離婚，邊個提出先都已經唔係問題，呢件事已經和平解決咗，大家仲係朋友。做人要向前看，接受，大家都會放低向前出發。」
Janis仲話：「其實身邊啲朋友都知道呢件事，我只係冇特別同大家講，係拍緊嘅時候有少少激動，人哋先問我發生乜嘢事。我冇諗過要隱瞞，又或者要講大話，始終都係要面對，嗰陣連公司都唔知我嘅狀況，所以真係要講聲唔好意思。」
之後又講到屋企人對佢離婚嘅反應，Janis再度爆喊，轉身抹完眼淚、平復一輪先再話：「我覺得好對唔住大家嘅爹哋媽咪，要老人家擔心、傷心，真係唔好意思，不過我哋真係有努力過。」
|
鍾意就快D Share啦！
|
|
|