熱爆娛樂: 誠哥踎過石塘咀 [壹週刊 - 1434

2017年8月31日星期四

誠哥踎過石塘咀 [壹週刊 - 1434 - 財經] __,M1,

李澤鉅透露父親樂見公司用番長江實業之名。

中環人語

誠哥踎過石塘咀

小超人李澤鉅在長實地產（ 1113）開股東會後，鐵定公司英文名為 CK Asset Holdings Limited，中文則以老豆李嘉誠發跡時所用的「長江實業集團」，正式接過「帥印」，風騷嘅 Victor Li話：「改番（名）做長江實業，成個董事局，包括我爸爸在內，全部都好高興！」

其實長江實業呢個公司名對誠哥來講「最老黎」，他最初同拍檔陳正光、叔父李奕及堂弟李澍霖等人開塑膠花廠，成立的第一間有限公司，名為利中實業有限公司，誠哥當時仲住喺石塘咀舊樓，創業之初並非一帆風順，聽啲曾在其膠花廠打工嘅老人家講，創業之艱辛曾把誠哥逼到跳樓咁滯；至六四年，即長子出世嗰年，成立長江實業有限公司後，就老黎咗幾廿年，所以命要生得正，名要改得啱。

李嘉誠一九六一年成立的利中實業是首家登記之有限公司，他是大股東，當時報住地址鄰近石塘咀，現已拆卸興建為單幢樓。

孫漢明瞓身一帶一路

香港人買唔起香港樓，遠至緬甸仰光樓盤都殺到香港吸客，個全版廣告都幾搶——「一帶一路，一馬當先，馬到功成」，咁招積嘅 slogan相信係出自呢個盤嘅發展商 Marga Group，即係地產代理屋之島創辦人——孫漢明（ Stephen Suen）手筆，現時人稱他「孫爺」，九十年代佢創先河只聘用大學畢業生做經紀，佢親自訓練經紀以 harsh出名，勒令所有下屬要熟讀《 Think& Grow Rich》這本書，所謂嚴師出高徒，佢唔少徒弟都上咗岸，孫爺早年勇闖緬甸，都建立唔少政府人脈。六月初，小宗喺曼谷 Okura Prestige五星酒店碰到孫爺，風塵僕僕嘅佢似乎病倒了，大熱天時著住件冷衫，同個仔 Eliott趕飛機返仰光同部長開會，身體力行一帶一路㗎！

孫漢明畢業於香港大學，並住入利瑪竇宿舍；九十年代訓練經紀時，務必要他們閱讀這本書，以激發上進心。他現為 Marga Group的主席。

香港的酒店財團如嘉道理家族的半島酒店，郭鶴年的香格里拉等已在仰光插旗，孫漢明的 Marga Group則在港推樓盤。

中環寸嘴　 Everything has a price

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

哈，睇 viuTV新聞，林鄭走去天津全運村同香港運動員打氣，竟然講話冇獎牌都唔緊要，咁講完全唔 logical，政府對運動員資助係根據成績，乜佢唔知咩？好似「洪荒之力」大陸游泳運動員傅園慧攞第二名人氣猶勝第一名，代言人合約成千萬送上都拒絕。希望諸君攞獎牌多加注意，否則金牌同爛銅有何分別？最多攞去景福熔咗佢。希望啲年輕運動員唔好為爭取好成績而食禁藥，唔好立亂食禁果。林鄭真係唔係嗰皮，應該提供特別稅務優惠予商業機構，鼓勵多聘用運動員做宣傳推廣，或者好似恒生銀行咁，整個「優秀運動員獎勵計劃」，一有獎牌就明碼實價俾運動員，牛下女車神李慧詩攞奧運銅牌，都獎咗七十五萬俾佢，跟住就講自己係銀行尊貴客戶。我真係好熟恒生，滙豐未𡁻起恒生之前，都要睇你邊個 House，我老豆入到恒生都要強調係何添嘅馬房，其他則分為何善衡或林炳炎帶過嚟嘅客，呢個世界都係見高就拜，見低就踩，客仔耐不耐都要騷吓身價！

七月份利物浦球隊來港比賽，我都著番件搶眼 T恤去睇波，正所謂「人老心不老」嘛！

恒生最實際，每逢運動員攞牌皆有獎金。

二房叻過元配

昔日富豪的二房好多風頭蓋過元配，因為能「幫夫」助其闖天下，敝刊無意發現，出世紙顯示，羅旭瑞親生老母另有其人，名叫李意奇，而非羅老太杜莉君。同樣鬧爭產的新地郭氏家族，創辦人郭得勝的元配黃秀瓊在鄉下早死，再娶較有家底的大東紡織太子女鄺肖卿，誕下三子三女。新世界鄭家純親家龐熙，亦非生前交遊廣闊，黃埔軍校教官女兒龐老太龐熊少珠所出；最近返香港的前港姐李明慧已故奶奶陳麗玲亦非陳樹渠元配。舊日社會，二房能幹又幫到丈夫，母儀天下之勢，真係威過元配㗎！同今時今日小三、小四有天淵之別。