克勤怕生女益人同老婆斷「交」
李克勤有港姐老婆又有兩位優資愛兒，若再添一女可謂人生更圓滿，但這位模範爸爸竟怕生女會「益人」，笑言要跟老婆盧淑儀斷「交」，寧願禁慾、結紮甚至「食自己」也誓不再造人！不過生仔另作別論，克勤笑言兩個囝囝「有賺無蝕」，故御准任意「播種」。
李克勤將於9月3至11日假紅館舉行一連九場《李克勤慶祝成立30周年演唱會》，日前接受專訪時大談入行逾30年的人生點滴。談及娶得前港姐冠軍盧淑儀為妻，又誕下李立仁與李力司兩位優質兒，若再生多個女兒就人生更美滿，可是克勤頻頻喊驚！他多番強調不會再生，戲言寧願禁慾：「我聽日去（結）紮咗佢，我『食自己』都唔恨女！我係麻煩老竇嚟(o架)，如果有女嘅話，佢件衫低胸啲、條裙短啲或者搽指甲油，我都會鬧，仲會搵私家偵探跟住佢！（你生女一定靚喎？）唔想益人囉！如果覺得個女仔靚，咪叫個仔溝咗佢囉。」
仔唔怕蝕：放佢出去「播種」
相對兒子的管教，克勤採取全面性開放態度：「仔唔怕蝕！放佢隨時出去『播種』，安全啲就得」至於太太是否跟他意見一致？克勤直言老婆也不想再生，因為實在太辛苦：「又重新嚟過？唔好玩」況且加盟英皇後工作很多，尤其忙搞演唱會，他說：「啱啱努力做嘢，唔得閒努力做嗰啲。」雖然工作忙碌，克勤鍾意親力親為湊仔，揚言絕不後悔為一對寶貝仔放慢如日方中的事業：「有啲人問我十年前做乜退後咗幾步，我唔係話自己做老竇有幾偉大，只係大仔出世，所以推咗好多內地嘅工作，唔想離開個仔太耐！好似第一季《我是歌手》搵我，我連酬勞未問就推咗，放棄咗好多機會。」但他從沒有可惜的感覺，因享受兒子的成長過程：「好似帶佢哋去百貨公司買比卡超卡，你估呢啲唔使做呀！」
不過，克勤暗酸兒子比他更受歡迎，皆因有次外遊時，兒子竟被Fans追住狂影：「我都叫佢哋唔好影啲仔！（唔影你？）咁碧咸個女都好多人追住影，我咁諗個心會好過啲。」又笑言其實樂於Fans「集郵」，但要有一個條件及視乎環境：「我同啲仔一齊就唔想影相！因為怕我啲仔唔知走咗去邊，仲有次我喺廁所『舒暢』緊時有人想影合照，我都好驚而唔影，怕佢(目及)我！」談及太太盧淑儀，克勤爆料指她愛煲師奶劇：「佢鍾意睇《三生三世》嗰啲，我唔明點解佢睇到喊！我就鍾意睇美劇。」
不再獨裁：唔啱聽先出聲
提到事業，克勤自言去年簽約英皇是因緣際會，並以穿梭機比喻自己：「2011年，我喺個唱揀《再見穿梭機》做最後一首歌，係想講穿梭機喺嗰個年代退役，但唔代表所有嘢完咗，人生一個章節完咗，其實係另一個章節嘅開始！正如我簽英皇一樣，係時候另一個開始。」克勤又指心態有變，今次演唱會跟以往的「李克勤演唱會」必定不同，又承認以前很獨裁：「以前我鍾意自己話晒事，要帝王式咁執行，但依家就係投票，不過唔啱聽嘅我都會出聲。」問到演唱會可會請譚詠麟做嘉賓，令「左麟右李」再現？克勤有所暗示：「同校長（譚詠麟）感情冇變，但係嘉賓……我心裏有數囉！」
文：音樂組
形象：Queenie Yu
髮型：Adolph Bow
化妝：Angel Y
場地：彌敦酒店嵩雲廳
|
鍾意就快D Share啦！
|
|
|