熱爆娛樂: 追足 2年　發力過賭王一關　楊受成細仔溝掂何超蓮 [壹週刊 - 1434] _

2017年8月31日星期四

追足 2年　發力過賭王一關　楊受成細仔溝掂何超蓮 [壹週刊 - 1434] __,何超,賭王,何鴻燊,楊受成,何超蓮,超蓮,何超儀,M1,

娛頭

追足 2年　發力過賭王一關　楊受成細仔溝掂何超蓮

何家淑女，兵哥好逑。賭王三房千金何超蓮裙下臣無數，收兵名單有霍震霆二公子霍啟山、內地富二代劉根森、柯震東等。強手當前，但楊受成細仔楊政龍絕不放棄，自 15年超蓮跟吳克群分手後，追足兩年，近月終於攻陷契妹超蓮防線。一度埋身的方力申被 out，契哥楊政龍得米，現在發力過賭王一關！

間中一齊失蹤

獲派「契哥卡」，通常意味硬食檸檬，但跟契妹超蓮同是富二代，青梅竹馬的契哥楊政龍並沒棄戰，多年來癡心情長劍，終於溝掂超蓮。

「超蓮同 Alex（楊政龍）自細就識，好多 common friend，成班人一齊玩，大家都知佢好錫超蓮。不過呢幾個月，佢兩個間中會一齊『失蹤』，齊齊唔現身，大家都估到係乜事。」知情者說。

打風孖住睇戲

上週二（二十二日）晚，颱風天鴿壓境，二人仍然「打風都打唔甩」，孖住去九龍塘睇《俠盜聯盟》首映。「 Alex話想睇劉華呢部戲，超蓮打風都特登陪佢去。」知情人續說。

當晚超蓮一身黑色便服，楊政龍就明顯放工 look，在一男一女友人陪同下到場，首映九點四十分開始，但兩人十點才到場，希望避開記者。由商場步向戲院時，超蓮和楊政龍並肩而行，有說有笑，好冧！

兩人去戲院攞飛時已接近開場，身邊各有朋友做掩護，依然好有戒心。

睇完戲，二人在一男一女朋友掩護下離開，楊政龍發揮幽默本色，氹得超蓮好開心，笑唔停。

搭電梯去停車場攞車，楊政龍同超蓮一齊聽自己電話留言， sweet爆。

散場後，雖然就快掛八號波，但楊政龍做埋司機親自送超蓮返屋企。

親自送返歸

去年年底，楊政龍搵埋阿 Sa、張敬軒等做伴，安排超蓮在淺水灣食星級飯局，飲完白酒再飲紅酒，全程氹得超蓮笑唔停。

到達戲院時，已變為前後腳，見到傳媒未散去，二人顯得相當避忌，更分開入場。最後睇足全場，楊政龍親自駕車送超蓮返回布力徑大宅。

去年七月方力申成功埋超蓮身，同期楊政龍亦跟王宗堯 model舊愛黎紀君（ Christy）三度復合。雖然楊政龍向來多女埋身，但心裡一直有超蓮，所以極速撇 Christy，繼續專心追超蓮。

共度情人節

「其實 Alex一直有追超蓮，舊年陪佢睇 Twins演唱會，揸埋機幫佢影相。又試過約埋阿 Sa、張敬軒同超蓮開餐，成班人幫拖追女。今年情人節超蓮做義工派曲奇，楊政龍抬腳架做攝影師，為佢不停影花絮，製造機會同佢共度情人節。放晒時間、心機喺佢身上，超蓮慢慢開始軟化。」知情人說。

何家千金雖然無憂米，不過倫敦大學一級榮譽畢業的她，依然勤力上進，早前就埋頭苦讀考會計師牌。

今年 8月，菁英會舉行新一屆就職典禮，身為副秘書長的楊政龍自然要出席，超蓮亦特登盛裝去捧場。

楊政龍有份策劃新樓盤「喜遇」，超蓮咁啱被發現在上址出現，曲線幫手宣傳。

博賭王好感

雖然已經追到超蓮，但楊政龍還要過賭王那關。當年賭王曾公開批評跟何超瓊拍拖的楊其龍質地唔好，所以同父異母的楊政龍亦努力給賭王好印象。

「 Alex知自己係爸爸楊受成嘅接班人，一直好勤力做嘢，就算去蒲都唔會狂劈，玩完第二日亦會準時返工。除咗希望有好表現令爸爸滿意，亦係做俾賭王睇，希望佢知自己係認真做嘢嘅人，唔係玩玩吓嘅富二代。」知情人續說。

事實上，楊政龍多次代表公司去投地交標書，參與不少地產項目。超蓮愛屋及烏，對英皇的樓盤特別關注。上週五（二十五日），她秘睇英皇新盤「喜遇」的示範單位，十分關心楊政龍的工作。

賭王近年身體抱恙，少外出，不過對何家淑女拍拖對象向來着緊，要過賭王一關，絕對唔易。

超蓮早前跟閨密去度假，噴血三點式照「不慎」流出，大騷白滑肌膚，有樣有身材，絕對是何家至索千金。

150億王國　楊政龍開始接班

楊政龍一向得父親楊受成器重，在美國大學畢業後，一直在英皇集團幫手，由低做起，負責地產及金融部門。安排他參與聚集富二代的菁英會外，其他公職包括中華全國青年聯合會委員會委員、北京青年聯合會委員等等，本月更帶青年團探訪浙江。

楊受成一直部署讓他接棒，近期楊政龍不時代表英皇出席地產界活動，又多次代表公司去投地交標書。今年英皇新春聚會，他更以主人家身份，代表公司頒獎給各大代理，父親也只是站在一旁， 150億英皇王國接班人地位明顯。