一部劇集嘅成功，除咗男、女主角睇得做得戲之外，其實劇中其他演員亦唔可以忽視，好似近排出街嘅劇集，有唔少熟悉嘅面孔都有出色嘅演出，不過觀眾們可能唔知佢哋叫乜嘢名，而《同盟》嘅監製Jazz，連日嚟fb感謝一班演員，噚日佢仲點名讚其中一位大家都好有印象嘅演員 － 何俊軒。話說喺前晚播映嘅《同盟》，鮑起靜被鄭子誠要求運軍火，點知鮑姐當面拒絕，仲激怒埋何俊軒飾演嘅泰國游擊隊首領Johnny Cub，雙方拔槍對峙，最後不歡而散，仲為鮑姐嘅安危埋下伏線。Jazz喺fb留言讚何俊軒好敬業，拍另一套劇受傷後都仲好擔心未完成嘅戲份，堅持可以拍上半身，非常專業。不過似乎短時間內都未必有機會再見到何俊軒喇，事關何俊軒回覆監製時就自爆已經同大台辭職：「其實今次受傷對我打擊好大（斷後十字韌帶）可能需要漫長時間去休養同物理治療，所以我作出一個重大決定！我已經同TVB辭職了，終止16年演藝生涯，決定移民加拿大，呢段時間我會好好裝備自己。希望我真係有機會可以再返TVB同大家見面，一齊拍戲、一齊食飯盒、一齊捱夜⋯所以今次可能是我最後一次幕前演出，希望大家喜歡我呢個角色。」噚日何俊軒接受傳媒訪問，講到結束16年演藝生涯移民加拿大，佢坦然承認呢件事，仲好坦白話下咗好大嘅決心：「其實好多因素，一來年紀大，我今年已經42歲，二來今次受傷，我冇信心再埋位，就算PA講好話拍文戲，我都好驚，好驚要臨時要加多一場追逐戲，我好驚累咗人，真係冇信心。」佢仲話雖然勞工賠償最多2年，不過唔想俾人感覺賴死唔走，仲主動拒絕向大台索取往後嘅工傷賠償，希望可以盡快判傷，攞完賠償就走。之不過話晒做咗16年，近年喺事業上又有起色，先後喺《同盟》、《踩過界》都得到好評，問到佢有冇覺得可惜？何俊軒話：「少少啦，好似我屋企人咁講，佢哋話我真係黑仔，o依家叫做有少少起色，有啲角色發揮，點知又話整親要休息，轉個頭又話要走，整定冇得做呢行。」何俊軒又透露，另一個原因就係一直喺身邊支持佢嘅太太，佢話：「呢個夢我追咗10幾年，我太太喺我身邊支持我，講真，一個男人為咗追夢，得嗰幾千蚊一個月，個女人同你捱咗咁多年，你呢個夢都應該要醒，要為佢作出啲一啲回報，我哋都傾咗好耐，我太太係加拿大人，大家都年紀大，爹哋媽咪退咗休，想多啲時間留喺佢哋身邊，返去係唔錯嘅選擇。」不過何俊軒又話因為呢件事同太太意見有分歧，佢話：「我最初都係諗住停薪留職，o依家傷咗，我話去移民，公司都應該唔會話唔俾，但係問題出現，如果我抱住呢個心態，去加拿大坐完3年移民監，再返嚟香港發展，咁我使乜過去坐監，直頭加拿大護照都唔要，喺香港休息咪得，隨時可以返工，最多唔接動作戲，做文戲一樣可以照返工。不過如果我抱住呢個心態，過去移民好辛苦。」雖然何俊軒決定豁出去，不過亦坦承唔捨得：「我唔想俾條後路自己，3年後又可以返嚟，嗰陣發生乜嘢事都冇人知，所以今次破釜沈舟，係好有決心，唔好理自己幾多歲，唔好理自己嘅健康狀況，去到嗰邊努力keep fit，比拍《飛虎2》嗰陣更加大隻，更加健康，唔好跌一跌就整親，跣一跣就斷骨，希望過到去重新開始，重新洗牌，重新適應，重新學習。」
|
鍾意就快D Share啦！
|
|
|