澳門同香港噚日受「天鴿」影響，澳門更加係重災區，好多地方都停電停水，往來澳門嘅交通都大受影響，雷頌德（Mark）日前同老婆梁家玉（Jade)及兩個囝囝去澳門旅遊，本來噚日返港嘅，最終都滯留一日，今日下晝3點幾先返抵香港。
《蘋果》讀者蔡小姐則透過「爆相爆片」，指Mark喺澳門上船期間，因被指「打尖」問題與乘客爭執，大鬧碼頭，又要職員替佢攞行李。讀者蔡小姐同《蘋果》講：「今日班船係下午1點40分，因為噚日澳門好混亂，所以好多人都改咗今日去碼頭等返香港，我11點幾已經到咗等候補位，而雷頌德一家就12點幾，施施然到。」蔡小姐又話：「佢哋一家嚟到，入咗閘就企喺度等上船，有船到佢哋就喺條隊攝入去，即刻就有人同佢講『先生!唔該排隊啦』，其他人都起哄，然後佢就發咗狂咁喺度鬧，問工作人員條隊究竟喺邊？又話俾在場啲人鬧。」
蔡小姐認為人人都應該要排隊，唔係明星大晒，如果趕可以坐直升機：「之後見佢（Mark）好快咁跑咗入經濟位，好似又話人坐錯位，但其實劃咗位㗎喎，唔知點解佢會跑入去，仲有佢咁快同職員上到船，即證明佢冇排隊」
《蘋果》趕去中環碼頭接到啱啱落船嘅Mark，佢接受訪問時話今次係去玩，本來噚日返，但因為打風滯留咗一日。講到佢喺澳門上船同乘客有爭執？Mark即滿肚冤屈話：「係呀，有啲忟憎，總之我係一個好守禮貌嘅人，反而俾人話我打尖，所以我好嬲，唔好講喇！」
事後，《蘋果》再聯絡Mark希望了解更多還完真相，心情稍平伏嘅Mark透過短訊回覆話：「其實我哋係買咗豪華位，本來上船同落船都係唔需要排隊，嗰個經理都叫我哋入咗去之後唔使排，但係大家都知道呢兩日澳門都好混亂，所以我哋入閘都照排隊，無乜所謂，人多大家都係咁，入咗閘職員就叫我哋上船唔使排，咁我哋企咗喺側邊等上船。」
Mark話有船嚟就跟住人潮咁行：「突然有個女人話我哋打尖，我身為一個公眾人物話我打尖，當住幾百人前話打尖，我係覺得我有需要平反，因為我好憎俾人冤枉。」Mark之後同身邊嘅嗰位經理一齊上船搵嗰位女仕，Mark強調：「我唔係話要話人，我只係想同佢講，未清楚件事唔好批判人，想討回一個清白。」
Mark承認為呢件事有唔開心，佢嘆氣話：「我喺呢行咁多年，我已經Build Up咗我嘅禮貌，我係點樣做人，做咁多嘢係想做個好榜樣，我調番轉俾人冤枉。」Mark仲話，好明白今日好混亂，船公司好難分到唔同嘅隊，只係覺得應清楚件事先去鬧人。至於叫職員攞行李，Mark指對方因為唔好意思，主動話同佢攞，佢已經不停講話唔使，Mark無奈話：「我從來唔會點人做嘢架！」
|
鍾意就快D Share啦！
|
|
|