人人搞離婚，你估人人都想離婚咩？人稱煒哥嘅陳煒，喺台灣富商顏志行同台灣女歌手鄭雙雙緋聞傳得熱哄哄之際，驚爆離婚消息！紙包唔住火，煒哥焗認之餘，仲自爆已經同顏志行離婚五年。回番帶，佢舊年仲帶埋「老公」上自己節目《煒哥的味道》硬銷恩愛，原來只係Cosplay扮夫妻，網民同口痕友即時鬧爆煒哥講大話。
有頭髮邊個想做瘌痢，離咗婚五年點解一直要扮有老公？直到顏志行同疑似小三嘅緋聞言之鑿鑿，煒哥都只係認離婚，堅稱唔關第三者事。你估女人青春賣十蚊呀？煒哥依家女人43有樣有身材有價有市，唔通仲等年齡增值戰鬥力貶值，先嚟對外開放市場咩？唔使Nuts哥講，三歲細路都知煒哥想留一線同老公復合
鍾意萬歲 豪氣干雲
查實顏志行同鄭雙雙緋聞都傳咗一段時間，但過去一年，煒哥人前人後都Keep住提老公扮恩愛，唔係因為2014年顏志行科水買貝沙灣當做贍養費同揞口費，而係煒哥想幫前夫洗白，等襄王有夢會自動返番自己身邊。只可惜佢係煒哥，唔係神女，隱性雄性基因實在太強大。
點解陳煒叫做煒哥？唔係因為佢個名同壯陽藥撞音，而係佢由亞視年代開始，出晒名有義氣唔錫身，騷胸賣性感、危險動作親身上陣，加上就算佢當年仲未疊水，已經鍾意萬歲請人食飯，豪氣干雲，巾幗不讓鬚眉！陳煒嘅男子氣概，比好多企喺度小解嘅男人更加雄赳赳，煒哥之名由此來。
人係慣性依賴動物，煒哥唔只連歷任舊愛臭史都冇講過半句惡言，就算顏志行出現小三傳聞都有苦自己啃，身邊個個男人都當佢金鐘罩擋得就擋，你估金鐘罩真係冇罩門？煒哥真係威而鋼咩？
構造特別 專一長情
煒哥同顏志行喺2008年結婚，佢頭幾年處於息影狀態，嫁「行」隨「行」，做小鳥依人。但係男人太小朋友同犯賤，大多數多情而長情；女人就剛巧相反，專一而絕情。不過煒哥構造比較特別，係專一而長情嗰種，依家就話留一線畀顏志行，望破鏡重圓，到有一日佢過盡千帆，煒哥變成真「偉哥」，唔介意做嗰個「有需要男人想啪番粒」之時，到時襄王有夢都冇用。
其實做女人又何必太Tough，企起身小解會尿濕條裙，煒哥不如做番煒妹，做人自私啲又如何？起碼等人保護都矜貴啲，或者襄王都會鳥倦知還呢！
|
鍾意就快D Share啦！
|
|
|