陳自瑤同王浩信(Vincent)早前傳婚變，有指蔡思貝介入，一直得王浩信出嚟回應，陳自瑤只係喺微博貼自拍相，或者囡囡合照，未有提及老公，令婚變傳聞更加似層層，又傳王浩信想追仔，不過陳自瑤覺得生一個就夠，又鍾意拍劇，令佢哋一度冷戰（相關新聞： http://bit.ly/2wHakCc ）。今日兩公婆現身天水圍出騷時，以行動打破婚變傳聞，雖然兩公婆均冇戴戒指，不過全程喺台上有講有笑，敏之仲唔覺意爆咗王浩信好恨生仔添！
陳敏之抱埋囝囝「雷冬至」(雷子樂)一齊出席活動，喺台上搶晒風頭，但一手抱仔，一手拎咪，王浩信見敏之咁狼狽就主動話幫手攞咪。YoYo見子樂一啲都唔怯場即大讚﹕「以子樂呢個歲數好犀利，一啲都唔喊。」王浩信反問﹕「我哋個女以前有冇喊？」YoYo話﹕「有。」點解感覺咁生疏？Vincent似乎真係好少幫手湊女喎......。
之後，敏之突然爆料話Vincent好恨生仔，敏之話﹕「之前拍劇時候，你做我細佬，知你都好想生仔喎。」搞到Vincent個樣勁尷尬話﹕「嘩！你o依家講啲咁嘢，又有嘢俾人寫架喇。」敏之繼續講﹕「知你鍾意男仔嘛，俾個仔你抱住先。」王浩信抱住BB，YoYo笑笑口話﹕「子樂都冇喊喎，但佢應該鐘意我抱多啲，因為男仔鐘意靚女。」
此外，王浩信喺台上話平時同小朋友都有去天水圍玩，到陳自瑤講嗰陣，王浩信笑指太太係「教育部部長」，陳自瑤同王浩信喺台上開口都係講「一家大細」，力證感情冇變。
|
鍾意就快D Share啦！
|
|
|