克勤:出年我唔玩喇，俾吓面（設計對白）
側田:你講到咁，惟有當敬老（設計對白）
探熱針
放風明年唔攞獎 李克勤出口術 側田隨時讓座
近年各大頒獎禮星光薄弱，吸睛度、認受性已大不如前，但入行三十年的李克勤，就想趁五十大壽威一威，成為各大頒獎禮大贏家。據知，今年各大頒獎禮的男歌手獎及商台的至尊大碟獎，克勤志在必得，故近日英皇開始放風，指克勤會宣布明年引退頒獎禮，藉此向各大電台施壓，為他爭取橫掃男歌手獎及至尊大碟獎。一直被視為「至尊唱片」得獎大熱的側田，面對克勤要求完美句號，隨時要拱手將大獎讓俾前輩。
講到明恨獎
入行三十年的李克勤，年初以三千萬高價過檔英皇，參加內地歌唱節目《我是歌手第四季》成功打入內地賺人仔，加上開了入行三十周年演唱會，為事業再創聲勢。
近日，各大電台收到英皇唱片放聲氣，指克勤玩埋今年頒獎禮就不再攞獎，「十二月六日係克勤五十歲生日，佢話會宣布出年唔會再玩頒獎禮，所以希望今年可以攞個大滿貫，拎晒咁多個電台嘅男歌手大獎，以前佢成日喺商台叱咤食白果，所以佢今鋪仲講明最想拎叱咤嗰個『至尊大碟獎』，公司一早已經話將容祖兒及張敬軒放埋一邊，集中火力谷克勤，難得陳奕迅今年冇歌，要拎就要趁今年拎晒，克勤自己好明白。」有英皇員工透露。
做場大龍鳳
為幫克勤圓夢，英皇九月先為他開八場個唱造勢。個唱上，克勤感觸表示近年是事業衝刺期︰「每個人，尤其男人，唔同年紀都應該有唔同夢想。」為頒獎禮部署鋪定路。
近日他宣傳新歌《龍鬚糖》，更做了場大龍鳳，在商台擺檔整龍鬚糖，再去電台派給 DJ們，又揚言今年會力撐各大頒獎禮，一反以往低調作風。對於有指他今年會首奪叱咤男歌手金獎，他坦言︰「讀書不是求分數……就假，但交俾公司處理，有就開心……」
大熱是側田
環顧今年樂壇，陳奕迅主力返內地賺人仔，香港氣勢減弱， hit歌欠奉。反觀側田回歸香港戰場後，幾首派台歌都氣勢如虹，登上各電台的榜首，分數計是叱咤「至尊大碟獎」暫時領先的歌手。不過，突然殺出克勤開到口話最後一年攞獎，各電台自動波俾面、識做，幫他圓夢畫上完美句號。前輩要攞尾彩，有指側田已做足心理準備，隨時拱手將大碟獎讓俾克勤。
撰文、攝影：娛樂組
|
鍾意就快D Share啦！
|
|
|
