黃有龍被傳發跡前是一名司機，旁為他的影星太太趙薇。
中環人語
內地官員司機點發達
影星趙薇由影壇走入股壇，既同馬雲相熟，又曾獲神秘富豪肖建華借錢；可惜高調總會出事。最近佢同老公黃有龍，以龍薇傳媒收購另一家上市公司搞出個大頭佛，被內地證監會揭發涉空殼交易，仲有批投資者排住隊等索償。講番佢老公黃有龍，有內地媒體傳出，其上位之「路」是曾為前深圳市長許宗衡做司機。
被指做司機「發達」嘅唔只佢，仲有中國平安董事長馬明哲，曾被指係招商局原常務副董事長袁庚司機，而高銀地產老闆潘蘇通，就傳過曾幫韶關一名官員揸車，不過兩人都否認。內地揸車會發達？小宗一位打通內地人脈嘅老友話，內地官員司機，並唔係揸車咁簡單，根正苗紅，做到好多嘢。老闆約咗邊個食飯，同邊個高官熟絡，通通瞭如指掌，聽埋唔少資訊，甚至幫手處理。內地唔少人想巴結司機，都識做買一式兩份禮物，主子見兩份禮物一樣都會分一份俾司機「醒吓佢」！老友仲補充一句：「唔會送兩份現金，因為個官一定自己要晒！」
冼國林炮轟股壇長毛
由「冼師傅」冼國林做主席嘅第一信用（ 8215），上週五遭證監會勒令停牌，話事件涉資料誤導。冼國林最為人熟悉係詠春師傅，曾和英皇主席楊受成合資電影《葉問：終極一戰》。此後佢運勢急轉直下，有傳向英皇財務借了一億五千萬元，被入稟追數，後來終於還晒。今年五月，第一信用被「股壇長毛」 David Webb點名為「 50隻不能買的港股」之一，九月份股價累跌八成，冼國林仲被斬倉。
小宗問過冼師傅，佢解釋係一場誤會，問題好快已解決，仲炮轟股壇長毛：「我考慮緊適當行動。我不明白佢點解話我係 50隻不能掂的股票？公司業績好，無話資產流失。第二，我相信全香港創業板得我一間有派息，一間咁正路嘅公司""我都想問吓長毛有咩理據！」會否同大股東、曹貴子做董事嘅康宏環球有關？佢就話：「 Friend就肯定係，識咗十幾年，但公司獨立運作根本唔需要佢理。」由曹貴子任副主席的康健國際醫療（ 3886），本週一亦被勒令停牌，兩人認真同病相憐！
索羅斯門生開枝散葉
國際大鱷索羅斯嘅家族基金 SFM，早年落戶香港，惹來極大的狙擊憧憬，佢啲門生最近開枝散葉。任職八年嘅王大蔚（ Dawei Wang）另起爐灶，設立聚焦亞洲股票的對沖基金。跟進公司文件顯示，王大蔚早於今年八月已辭任 SFM董事，並於十一月初加入思博資產管理（香港）。該公司於今年六月才成立，辦公室設於尖沙咀港威大廈。董事除咗報住跑馬地比華利山的王大蔚，仲有前高盛董事總經理、報住貝沙灣的朱地武（ Zhu Diwu）。
王大蔚喺美國賓夕凡尼亞大學沃頓商學院畢業，主修金融學及房地產。 Intern時喺瑞銀做分析員，一畢業就入咗瑞銀，專睇房地產、住宿及休閒行業，後來轉投房地產投資公司 Rubenstein Partners，○一年再加入索羅斯家族基金，考察過多家 A股上市公司。 Dawei睇開地產，師傅又鍾意沽空搵食；今次自己走出來搵真銀，對香港樓市有無玄機呢又？
六嬸愛裝修買磚頭要 buddy陪
上星期人稱「六嬸」嘅方逸華病逝，享年 83歲，外界覺得消息好突然，但有鍾情睇公仔箱嘅金魚缸人士話，利孝和夫人要人攙扶，亦堅持出席無綫五十周年嘅台慶活動，做佢一年一度嘅切蛋糕工作，但卻唔見六嬸出席，可想而知當時佢嘅健康已經唔多妥。
六嬸膝下猶虛，大家都好關心佢過百億身家如何處置，但有同六嬸認識多年嘅老友話，老人家對生死睇得好淡，早已立下遺囑，相信好大部分跟番六叔嘅做法，將資金撥歸慈善，加碼做邵逸夫獎。
查實六嬸投資非常有眼光，佢嘅嗜好就係買磚頭，由於佢好信風水，覺得 TVB內有一位中層幾旺佢，於是將佢提升做 buddy，四圍去睇樓都帶埋呢位仁兄，覺得咁樣會有助佢嘅運勢，可以事半功倍。而六嬸最鍾意管裝修，投資嘅物業、商場和戲院都參與點裝修，其中佢自住嘅西貢大屋，除咗農曆新年休息三日外，幾乎日日都做緊裝修，事關佢認為裝修動土，喺風水上有利自己。
董事住堆填區變睡蓮
香港地好多人「憎人富貴厭人貧」，小宗亦唔例外，有鋪習慣睇即將招股嘅董事申報住邊度，大約知道佢嘅家底如何，南區或山頂嘅獨立屋見得多，即使地踎住公屋亦有見過好幾次，但玩到申報住「睡蓮」，真係第一次見。
有隻申請緊上市嘅建築股榮峰控股，有位非執董梁智偉申報住喺心曠神怡嘅「日出康城」其中一期，但其住址後面又括着係睡蓮。小宗不才，從未聽過香港有樓盤叫個咁有詩意嘅名，於是請教堆填區地產經紀，佢話印象派大師莫奈嘅名畫《睡蓮》（圖）就識，就算有都係臭蓮咁話。
話晒招股文件都有法律效力，唔知榮峰會唔會認真搞搞佢呢又？不過話分兩頭說，發展商嘅改名專員，亦可以從藝術角度出發，總好過「海之戀」、「愛炫美」吧？
本週圖片
真正白武士:貿發局一向有搞工作坊，近期咁流行「一帶一路」仲唔食住上咩？其中一個講座，請來「白武士有限公司」，分享點用數據去分析網上營銷效能。間公司由關廣智做董事，開咗業十一年，真正「開宗明義」。白武士專幫人起死回生，小宗都好期待講座嘅神奇功效！
撰文:宗菁華
|
鍾意就快D Share啦！
|
|
|
