58歲的前著名DJ洪朝豐患上狂躁抑鬱症後，去年底患上舌癌，割去3分2脷保命後，癌細胞擴散到淋巴，再患上淋巴癌，現已完成30次電療算是「執番條命」。浴火重生的洪朝豐再次重新振作接受東網訪問，身穿彩色名牌外套，襯黑長褲的他，精神爽利地在藍田寓所接受家訪，當他一打開門，見地下的磚有水痕，問他是否拖過地，笑住話：「係呀，因為你哋嚟嘛，要招呼你哋。」訪問時間為下午3時，得知他尚未食午飯，着他先食帶來的咖啡及西餅，他又笑住說：「唔使（食）住，咖啡可以飲，但西餅我食唔到，我只可以食流質嘢，可以做訪問先。」訪問做了一小時和他握手時，感到他雙手冰凍，原來他又是為招呼傳媒，家中開了冷氣，大病初愈的他「捱」一個小時凍氣，體貼又細心。
重新學進食
洪朝豐坐在客廳中的梳化受訪，讚他氣質不錯時，他全程笑瞇瞇，又不介意被記者觸摸他下顎位置手術後一條長長的疤痕，不過手術做得好，遠睇只以為是頸紋，而做過電療，其頸上留下的黑印雖減退但仍留痕，又因口中「再造舌頭」尚未完全消腫，且需要時間適應，影響了他的語言能力，他說：「依家我講嘢好似含住舊嘢咁，不過之前我講嘢好慢，因為條脷比牙床更大，成日夾到或整親，不過我覺得每日都有進步，我或者可以再教番唱歌。」
洪朝豐自言：「我已經好番㗎啦，有時我都唔記得自己係一個癌症病人。」至於醫生可有告訴他會否有復發可能？他指：「醫生冇講明，不過我就要每隔兩個月覆診。」他又說現時每日都過得很開心，心情正如他身上色彩斑燦的外套。問他之前在社交網曾透露有多次自殺的念頭，他說是因當時全因未能接受自己：「我最自豪係把聲，但嗰天一次過要攞走晒，我靠把聲維生，我點教人唱歌，點教人打坐，同埋我最鍾意食嘢，但醫生話我可能一生要食流質食物，依家我食嘢，要將啲肉用門口咬爛先，跟住要用筷子塞入口，即係生吞，根本感覺唔到味道，我飲果汁，最初頭係連有少少果汁渣都唔得嘅，不過依家我諗通咗，冇聲咪冇聲，食嘢冇味咪冇咪囉，個樣唔靚咪唔靚囉，最緊要我仲有條命。」
萌生自殺念頭逾廿次
洪朝豐回憶當初得知患癌後，情緒跌落谷底到要尋死，全因他覺得絕望，他說：「因為睇唔到痛苦嘅盡頭，我自殺嘅念頭有成20幾次，最記得有次我做完電療，個人好攰，突然內裏有嘢喺度不停同我講，死咗去啦，你又冇咗把聲，又食唔到嘢，個樣又肉麻，我返番嚟21樓嘅屋企，就走去欄杆度望，又諗如果我跳落去就一了百了，我又諗，我係咪要着拖鞋跳，下面係行人路，如果我跳落去可能會累到人，又諗過夜晚跳好啲，唔會好多人睇到，我又諗過吊頸，開媒氣、食安眠藥，不過又諗到唔好喺屋企死，唔好累到屋企人。」洪朝豐強調「想通」後明白自殺不能解決問題，覺得比死，選擇生活下去才更勇敢，所以呼籲所有處於低潮的人勿輕生。洪朝豐又說現時不再想尋死，全因他的學生送贈一本「救命書」令他開竅，他自睡房珍而重之取出了一本《一切如來心秘密全身舍利塔寶篋印陀羅尼經》書。他就說：「就係因為學生送咗呢本手抄嘅經書畀我，我睇完咗成個人『叮』咗一聲，諗通晒。」他又說想廣結善緣幫忙有需要的人，現正進行義印打算送書贈有緣人。
重踏斷腸地
洪朝豐自言已超越生與死，更不介意重踏他曾到過的斷腸地，當他步出寓所，寓所對面的後樓梯及𨋢位口都有個大天窗，站在曾被他視為「了斷地」的地方時，他緊握住鐵欄向下望住大球場及行人路時說：「我有畏高，我都驚㗎，腳都震晒，不過我唔會再諗跳落下嗰啲，依家跳返出嚟睇，就覺得根本唔使自殺，死都唔係咁易，如果死唔去仲大鑊。」
防止自殺求助熱線：
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|