熊黛林（Lynn）2016年同擁有百億資產嘅郭可頌結婚，去年成功懷孕，噚日就話Lynn已經榮升潮媽行列，剖腹誕下一對孖女(新聞連結：https://bit.ly/2hdLVi4)，今日佢就透過經理人公司發佈一家四口的全家福，一臉幸福，羨煞旁人！
新手媽媽Lynn表示第一眼見到兩個囡囡時，又感動又開心，Lynn話：「BB女5磅左右，眼仔好大好靚女，老公開心到不得了。」出名錫老婆的郭可頌，喺Lynn入產房前非常緊張，見到老婆同囡囡平安時終於鬆一口氣。但由於初生BB太嬌小，令新手郭爸爸不敢亂抱兩位前世情人，最終要靠Lynn出手：「我叫老公坐定定擺住抱B姿勢，然後叫我媽咪抱囡囡放在老公懷抱，老公後來抱到不捨得放手。」
郭爸爸有Lynn這個大情人，又新添兩位小情人，自然幸福滿瀉，Lynn更說看到大隻老公抱住嬌小B女的畫面，反差很大非常搞笑。而剛剛生完BB的Lynn精神相當不錯，且安心咁話：「媽咪都有飛過來香港陪我待產，我已慢慢開始學習湊小朋友，並餵人奶；因為是對BB最好的嘛，最緊要她們健康。」至於BB現時仍未改名，Lynn和老公會細心為囡囡挑選最適合的名字。
Lynn為郭家添孖女，升呢姑媽嘅郭可盈今日接受《蘋果》訪問就話：「一次過做孖女姑媽，探咗佢哋好得意，一個似媽咪，一個似爹哋，孖女磅數好平均，第一日就分到大孖細孖。」可盈有冇傳授湊女心得畀Lynn？可盈話：「雖然8年前，但我仲有啲心得。」可盈又話囡囡津津做咗表姐好開心：「佢爭住抱BB。」
問到可盈送乜嘢禮物畀孖姪女，佢話：「最緊要送番表姐着過衫仔，係傳統，將啲luck同兩個表妹分享。」可盈話孖姪女應該會搞百日宴：「湊孖女忙一倍，佢哋有排忙，我得閒都有去幫吓手。」可盈大讚弟婦Lynn叻女：「佢成個孕程只係初期有嘔，後嚟都好OK，BB出嚟又健康。」可盈表示無意再生，孖女正好係表姐最好玩伴。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|