藝人江欣燕與戴蘊慧相識33載，感情深厚，但兩位姊妹淘平日忙工作，甚少相約出埠。繼廿年前的日本東京之旅後，二人終於安排好時間再度「閨蜜遊」，到北海道滑雪。雖然今趟旅行出師不利，欣欣不慎跌倒整傷頸部及腰部，但無損其好心情，繼續與好姊妹豪食、豪玩！
欣欣今次與戴蘊慧到訪北海道二世古，當地是著名滑雪勝地，擁有四個大型滑雪場而聞名，每年吸引不少滑雪愛好者前往朝聖。欣欣相隔多年再滑雪，特意找當地教練「惡補」技巧，豈料甫出發已遇上驚險事故！她說：「我上機前同自己講，滑雪時唔好整親，點知一落機喺雪地行嗰陣，唔小心跣親仲要頭落地。好彩當地天氣好凍，我戴咗兩頂冷帽保暖，結果冷帽上嘅裝飾波波墊住，所以個頭冇事，反而整親頸同腰骨，尤其尾龍骨痛到好似一直被針拮咁。」
落機仆傷就住玩
第一日已出師不利，但難得與好姊妹去旅行，加上傷勢尚算輕微，故欣欣仍繼續滑雪行程，只是格外小心，以免傷上加傷！她說：「我仲有跟教練學玩Snowboard，但有傷在身一玩就腳痛，加上我返香港要做兩場騷，仲要着高踭鞋，為免再次整親，我全程特別小心，玩一陣就休息吓。同埋我唔敢由山頂滑落山腳咁危險，寧願慢慢搭纜車，順便欣賞雪景。」美景當前，欣欣亦忍不住邊滑雪邊Selfie留倩影。
揸電單車遇「鹹豬手」
此外，二人亦大玩雪上電單車，享受在雪地上奔馳的快感，怎料欣欣慘遇「鹹豬手」，笑言蝕晒底：「我負責揸車，坐我後面嘅戴蘊慧掛住影相，所以全程要捉實我，但就捉錯位置變咗摸胸，之後仲摸勻全身。不過佢對手套好厚，可能唔覺摸錯位置抽我水。」二人上完山又落水，轉場玩激流，欣欣大呼刺激：「不過玩完好攰，平時我都唔做運動，今次去旅行可謂做足一年嘅運動量！」
光豬浸溫泉
玩到周身骨痛，兩位好姊妹在酒店房內浸溫泉，消除疲勞，欣欣笑言跟戴蘊慧相識已久，肉帛相見亦不會尷尬。二人又去按摩鬆一鬆，欣欣說：「滑雪好消耗體力，着滑雪裝要用20分鐘，啲裝備又重，真係搬屋都冇咁攰！當地按摩師好專業，問清楚你嘅身體狀況，先決定按摩手法，果然一分錢一分貨。」
食鱈魚精子勁新鮮
去旅行點少得食？欣欣與戴蘊慧歎盡美食，包括海膽、長腳蟹及其他日式料理，想不到當地盛產鱈魚精子，欣欣一嘗後大讚新鮮：「難得去旅行，點都要豪食、豪玩、豪住，我哋每人一日一板海膽，但戴蘊慧好細食，結果我每日要食一板半。今次仲食咗鱈魚精子同肺部，感覺好新鮮！」欣欣此行突然胃口大增，即使鯨吞兩個魚生飯都唔夠飽，難怪她大呻足足重了5磅，但望落依然咁Fit，果然是得天獨厚！
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|