古天樂入行25年，終於摘下金像影帝，而他在台上一番話，大大力為香港電影打氣，例如佢話：「我好想講嘅就係，我哋香港人今日一定要團結，我哋一定要做好香港電影。呢個係我好想講。」
之後古仔續道：「好喇，唔知講乜喇。因為我冇諗過……因為我其實唔係一個好多嘢講嘅人嚟嘅。我亦都唔知我可以講乜。但我必須要多謝《殺破狼‧貪狼》嘅所有單位。多謝出品方周焯華、唐才智、于冬。多謝監製Paco（黃柏高）同鄭保瑞，特別係Paco，因為有一日，我同佢宣傳嘅時候，佢失驚無神送咗個金牌俾我，嗰個金牌仲係龍。佢話，你袋住佢啦，佢保你平安。如果有一日你攞獎，要送番個金牌俾佢，我話好呀，因為佢係一個『金牌經理人』。」大家又拍爛手掌。
古仔亦感謝大哥洪金寶，以及眾手足群策群力，另特別感謝經理人芭姐。「同埋我想好想好想，多謝我屋企人。其實我依家咁大個人，我都同屋企人一齊住。我每一日都係我阿媽叫我起身。我唔可以唔同我屋企人一齊住。我覺得一個人，最緊要有一家人嘅支持。就等如我哋香港電影，一定要我哋所有香港人支持，我哋先可以將香港電影再做得更加好。」
向香港電影人致敬！
來源 source: http://hk.entertainment.appledaily.com
|
鍾意就快D Share啦！
|
|
|