關愛座又變批鬥座！有「才子」之稱的電台主持及專欄作家陶傑在facebook出po，指美籍香港印裔名記者兼翡翠台新聞雙語評論人禇簡寧(Michael Chugani)前晚9點在港鐵引起關愛座風波，並致電他希望可在其fb報道事件。陶傑引述禇簡寧事後悲問：「香港社會點解會變成咁？」
陶傑與禇簡寧早年合作拍過《陶傑英語教室》，齊齊拍片教英文。陶傑今午應邀在fb轉述事件，並轉載Michael提供的現場相片，他指昨晚Michael乘坐開往將軍澳之港鐵，車廂客滿，一位肥胖港嬸佔坐關愛座，而一位老婆婆與Michael只站著，「新聞評論人發揮專業天性，對肥嬸評論：『你見否這位老人家咁大年紀，可否讓座呢？』肥嬸拒絕，反駁：『佢又不是傷殘，點解要讓位？』」
陶傑指，Michael當時見狀，企圖用手機將肥嬸尊容拍下，肥嬸抗拒，亦用手機反拍，「新聞評論人平時上慣電視，Michael說：『你影我我唔驚，不過你又要俾我影番喎』」，肥嬸影完，再次拒絕。四周乘客微笑「睇嘢」，見到印度巨星出面維護社會公義，一名由英國返港之港人看不過眼終於讓座予婆婆，風波平息。不過，陶傑指肥嬸最後下車時口中唸唸有詞道：「死摩囉差。」
陶傑表示，榮獲名記者出頭義助之婆婆告訴Michael現已91歲，婆婆稱「有睇電視，認得你係名人，多謝你咁有正氣呀」，雙方合照留念，結局甚為溫馨。
對於Michael總結事件反問「香港社會點解會變成咁？」陶傑妙答：「睇嘢角度唔同少少，香港確實變緊，這位着玫瑰紅T恤的中年婦女，竟然有眼唔認得你，至少唔係TVB觀眾喎。」
網民對事件反應不一，有人讚揚Michael，認為有能之士無分國界膚色，同樣受人尊敬，而基於同理心也應讓座；同時有人批評Michael說法可笑，「人地唔讓位，佢去影人相然後傳比陶傑放上網。然後問香港點解變成咁？拿住部手機周圍影人仲好意思問香港點解變成咁？問得好丫」。
有網民質疑「紅衫呢位女士都可能有需要被人關愛呀」，亦有人慨嘆現時人人「當相機係槍」，一不合意就「抆出嚟」拍攝，「讓座係人情，係美德。但唔係一定要做，唔應該唔讓就要批鬥人」。
對於「摩囉差」一詞，有網民認為該女子是種族歧視。翻查資料，3年前，人民力量立法會議員「慢必」陳志全搭港鐵時，遭兩名中年婦人針對其性傾向爆粗辱罵，慢必向平機會投訴被歧視；但褚簡寧在《南華早報》撰文指兩名婦人有言論自由，2人有權取笑慢必下體尺寸，他人都有使用「蝗蟲」形容內地人的權利。
網民留言
Joey Lai：我同我九歲的兒子都好鐘意Micheal Chugani，晚晚跟佢睇時事，學英文??香港多元社會，有能之士無分國界膚色，同樣受人尊敬！
Ho Nam Cheung：個個當相機係槍，一唔順你意就抆出黎，正義L：「我影你架」，大賊：「我開槍架」。btw，讓座係人情，係美德。但唔係一定要做，唔應該唔讓就要批鬥人
Johnny Cheng：其實紅衫呢位女士都可能有需要被人關愛呀
Chris Chan：你又比錢我又比錢，點解一定要讓座？人地攰唔讓唔得？D老人家比2蚊周圍去，可能只係周圍行下，人地可能頻頻撲撲工作，呢D大愛左膠就上身影人上網批鬥，都痴L線
Eric Au：呢位褚簡寧都幾好笑，人地唔讓位，佢去影人相然後傳比陶傑放上網。然後問香港點解變成咁？拿住部手機周圍影人仲好意思問香港點解變成咁？問得好丫
Emma LO：當然不一定要讓座，但設立關愛座的目的是優先給予有需要人仕，讓座好應該，就算不是關愛座，基於同理心也會讓座，那有什麼人會沒同理心？
蔣大利：肥嬸識得鬧「死摩囉差」，顯然未必唔係TVB觀眾囉
Waynorn Twain：香港真係變晒，以前邊有人會俾人逼佢讓坐，仲要拎出嚟公審。
《蘋果》沙士15周年系列網站，正式登場：
https://hk.feature.appledaily.com/sars15/
|
鍾意就快D Share啦！
|
|
|
