去得好盡喎！
歌手趙學而在紅館舉行個人演唱會，中段趙學而換上一件白色毛毛長Deep V裝上台，唱出快歌串燒期間脫去白色外套，露出銀閃閃的Bra Top，大騷纖腰和瘦削身材，又同女舞蹈員大跳長十分鐘嘅勁舞，令全場沸騰！跳完之後她累得一度攤倒台上，然後坐在台邊說：「我對唔住排舞師，下晝明明仲記得啲舞步，都係甩咗幾吓，我出道以嚟都冇乜幾可跳舞，而家跳兩吓就氣來氣喘，真係年紀大，其實係可以再跳得好啲，但係我已經盡咗我最大嘅能力！」然後她唱出《談一場不後悔的戀愛》和《我恨我是女人》，她說是網民票選想聽她唱的歌。
爭氣加堅持捱到開紅館
到encore部分，她換上一條紫色高衩長裙唱出《最佳位置》後，多謝觀眾和台前幕後工作人員，再唱多兩首歌後，她說：「本身《再見了》已經係最後一首歌，但係有一隻歌我好想可以喺紅館唱多次，但係呢首歌單憑我嘅力量好難唱到，既然身邊冇嗰位前輩，可唔可以請現場嘅朋友同我一齊唱？」正當觀眾以為她要開口唱歌，她突然又說：「我有樣嘢想講，當年有段時間我嘅發展遇上阻滯，嗰陣有個位高權重嘅人同我講：『你冇價值㗎喇！』當一個藝人或者歌手，畀一個位高權重嘅人話佢冇價值，嗰一刻我都未到谷底，然後又有另一名位高權重嘅人同我講：『你唔唱歌唔會死啫！』我喺我嘅上一個演唱會都講過，爭氣呢兩個字係好難。」此時有觀眾大叫說她「贏晒」，她回應道：「贏晒？暫時嘅啫，不過既然我廿幾年都等到，往後嘅日子係點冇人知，每個人都應該為自己選擇嘅嘢而堅持落去。」全場為她歡呼拍手，她最後唱出《誰明浪子心》為演唱會劃上句號。
----------------------------
東網巨星開咗ig喇，大家快啲follow
https://goo.gl/KGuo2N
來源 source: http://hk.on.cc
|
鍾意就快D Share啦！
|
|
|
