2018年4月29日 星期日

【最緊要有自信!】趙學而銀色鐵罩bra玩性感:keep住『好平』如潮 __,學而,趙學而,

趙學而噚晚喺紅館舉行演唱會,捧場睇騷有陳奕迅,蔡一傑、蔡一智夫婦,靚靚袁詠儀、廖碧兒、江若琳同男友蕭潤邦(Oscar)等,張智霖擔任表演嘉賓。學而除咗 ...


趙學而噚晚喺紅館舉行演唱會,捧場睇騷有陳奕迅,蔡一傑、蔡一智夫婦,靚靚袁詠儀、廖碧兒、江若琳同男友蕭潤邦(Oscar)等,張智霖擔任表演嘉賓。學而除咗唱自己嘅歌之外,亦有唱其他人歌手嘅歌,仲有自己年代流行嘅兒歌。雖然學而一向骨感兼冇咩身材,不過噚晚佢都性感一番,有高叉長裙,其中一套衫,仲只係一個銀色鐵罩bra top,另一套就大露背。佢笑話:「其實女人都可以有選擇,o依家啲女仔唔夠信心,有啲女仔加啲減啲,我堅持唔加,keep住『好平』如潮,希望呢四隻字可以延續落去,去到老都唔會下墮。」

跳舞環節,觀眾反應好好,好多觀眾都企晒起身跳舞。不過學而跳完舞之後,就呻:「跳幾下就氣來氣喘,年紀大真係唔呃得人,我已經盡自己最大能力去做。」學而提到自己首個紅館演唱會時,亦兩道感動眼濕濕。當佢唱出《每隔兩秒》時,前奏一段笛音由現場樂手吹奏,不過學而入唔到key,即刻停低話:「哎吔!老貓燒鬚,竟然係呢首歌,從頭再唱過。真係激氣,等我仲懶靚咁行出嚟。」

學而提到喺94年出道,首次喺紅館開個唱,感恩有多朋友痛錫同支持,講到呢度,佢又想喊,不過最後都忍住:「我講過今次唔俾自己喊,剛才只係湧一湧,我會抑壓情緒。藝人嘅生命,邊會好似Chilam咁死唔老,尤其係女人,氣力好重要,為咗呢個騷,好大壓力,瞓唔着,我要用最好最僅餘嘅『老』力,係老人家嘅老,完成呢個演唱會。」

Encore時,學而演唱《誰明浪子心》,又再感性話:「我嘅星途曾經遇上阻滯,曾經有個位高權重嘅人同我講『你冇價值㗎啦』,作為藝人、歌手、演員都好,有個位高權重嘅人咁講,嗰刻我冇失落到去谷底,之後又有另一個位高權重嘅人同我講『你唔唱歌唔使死』,所以我上次演唱會曾經講過要增氣,不過爭氣係好難嘅事。」此時,有觀眾大嗌:「贏晒。」學而即回應:「吓?少年,你太年輕只係暫時嘅啫!路遙知馬力,來日方長,20幾年我都等到喇!後面嘅日子冇人知道,但每一個人都為自己選擇嘅路去堅持。」

另外,學而同Chilam合唱《現代愛情故事》,唱完之後Chilam後從擁抱學而,然後話:「9成9嚟睇騷嘅都係大家嘅朋友。」學而接話:「我識Chilam時,我哋都係啱啱入行,第一次見佢,我揸咪做佢訪問,啱啱出碟,我哋一齊登台,頭先唱嗰首歌喺內地唱過好多次。」Chilam接住再話:「你係少數歌手上台,唔會話細細歌就聽我嘅歌大,佢哋班後輩好冇教養㗎,以後我唔再做佢哋嘉賓喇!o依家我哋都咁高咁大,老皮老肉。」學而話同Chilam都冇咩點變,Chilam笑話:「係呀!樂壇人瑞大戰樂壇人乾嘛!我呢啲要縮肚縮到休克,你就仲係咁瘦。」

騷後,學而接受訪問,佢講到今次演唱會,只係用咗七日時間去排舞。而之前佢曾經講過想王傑做演唱會嘉賓,最終王傑都冇現身,學而話:「佢話會退引之後,o依家有好多工作排到麻麻,所以唔勞煩佢嚟喇!今晚呢個版本都好好,同觀眾好多互動。」全晚,學而多次感動想喊,不過最終都忍住,佢笑話因為上次演唱會時已經喊過,所以今次忍得就忍,唔想再喊。至於提到嗰個位高權重嘅人,問到係邊個?學而堅持唔講:「其實呢件事我講過,你哋估啦,我唔會講。多謝佢哋咁講,否則我冇咁大決心行落去。其實價值係自己,唔係人講一句,就抹殺自己嘅努力。」



精選娛聞,喺晒《娛果》

http://fb.com/appledailyent

攝影:林賓尼 學而除咗唱自己嘅歌之外,亦有唱其他人歌手嘅歌









學而同Chilam合唱《現代愛情故事》







只係一個銀色鐵罩bar top







Encore時,學而演唱《誰明浪子心》




鍾意就快D Share啦!