喺無綫節目《學是學非》做「綠色姐姐」嘅梁嘉琪，教人做科學實驗，開口埋口：「學是學非，明辨是非！」一副睿智、小牛頓咁嘅樣，不過世上有好多嘢係科學都搞唔掂嘅，連物理天才霍金都話：「女人是個謎。」咁是非精又點會冇死穴呢？而梁嘉琪嘅死穴就係日防夜防，小三難防！任佢做科學實驗幾叻都好，但愛情實驗就次次失敗，皆因是非精係防唔到狐狸精㗎！
醜事通天焗分手
講起梁嘉琪，除咗有個花名叫「涼瓜皮」外，亦有「危險實驗女王」之稱，數到最危險嘅一次實驗，當然係佢早排掛住開工，唔睇實條仔，由得佢去台灣密會小三單嘢條仔仲疑「搞出人命」，懵到上心口嘅嘉琪，到單嘢通晒天至知乜事，只好焗住分手，結束四年情，唔通兩女一男加個B，開圍麻雀咩！
太老定衰收尾
坦白講，嘉琪名氣雖然唔及無綫一線姐仔，但勝在吸金力強，打開電視，旅遊、護膚、家品廣告都有佢份，絕對係密食當三番，搵埋唔少㗎，所以幾年前佢被爆同電台監製阿金拍拖，唔少人都話係條仔高攀佢咁話，不過沐浴愛河嘅女人點會聽得入耳吖。嘉琪唔單止懶理閒言，仲鬼咁冧豬豬話想40歲前結婚，一時話先買樓後結婚，一時又話唔排除閃婚，坐定粒六等嫁阿金，仲連「我再冇青春同本錢去浪費」嘅底牌都講埋出嚟， 結果衰在太老定，家陣衰收尾囉。
講番轉頭，嘉琪以前同過張繼聰拍拖，最終畀謝安琪成功殺出，每段感情離離合合都有佢嘅原因，但曾經喺節目哭訴男友被搶嘅嘉琪，屢拍屢散，屢散屢拍，都唔係辦法。其實失敗皆因佢實在太大家姐得滯喇，雖然話今年已經36歲啫，但下下「敦」起個家姐款，點夠啲溫柔細膩、千依百順嘅小三爭呀？就講佢同阿金未散前，被人影到喺商場拍拖，行到離行離列，話係梁嘉琪帶細佬出街都有人信，咁樣拍拖不如唔好拍仲記唔記得早兩年有個導演被人影到同小三拍拖睇戲？個小三又主動餵食，又挨身挨勢送波餅，再當眾嚟個濕吻，睇到喇，男人受呢啲㗎嘛！
放逐探靈 又嘔又喊
不過梁嘉琪以前都試過唔識諗㗎喇，嗰陣佢演藝未畢業，就被有線睇中，可以話彈起得仲早過佢好姊妹黃翠如！可惜吖，後來瞞住有線參加出面啲電視劇女主角招募，被有線掟去主持《怪談》，去東南亞嗰啲唔知咩角落嘅鬼屋度探靈，呼吸住啲奇怪屍臭，搞到又嘔又喊，嗰陣霉氣同屍臭揮之不去，就算跳槽無綫拍《學警狙擊》，都被網民喪插演技差，又笑佢喺《學是學非》着黃翠如舊衫，佢自爆試過因為負評而流淚。直到近年「涼瓜皮」先抹甩霉氣， 爆分手都有網民為佢集氣送上安慰，可以話係「真想不到當初我們也討厭吃苦瓜，今天竟吃得出那睿智愈來愈記掛。」梁嘉琪雖然冇愛情運，但開始有觀眾緣，咁就算苦也不太差！
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
