王祖藍同李亞男結婚3年，一直都好努力做人，結果皇天不負有心人，今日佢哋喺社交網宣布有喜，而且仲專登喺佢哋拖九周年紀念日公佈喜訊，真係好有心思！
準爹哋王祖藍好開心話：「首先好感恩喇，可以喺拍拖九周年紀念日去宣佈呢件事，我哋拍拖嗰時係2009年，咁啱9年後有個小朋友，咁希望所有嘢都可以長長久久啦。亦都好感謝上帝，幫我哋安排晒所有嘢都喺計劃入面進行，之前應承過Leanne搬出嚟二人世界之後，過兩年左右先有小朋友，依家真係實現到，真係好感恩。」
祖藍仲話公司真係好旺丁：「我哋先後有兩個員工有咗，依家計埋我老婆就三個人，咁如果想生B，入嚟我公司做喇！」祖藍仲叮囑大家幫忙「睇住」老婆：「做媽媽真係好辛苦架，佢為BB付出咗好多，又睇書啦，又改變自己飲食習慣啦，又好緊張去預備好多嘢啦，所以麻煩大家照顧吓佢啦。」
祖藍仲搞笑話：「大家最近除咗睇法國定克羅地亞贏呢？我建議開多個盤，就係究意將來BB嘅高度係會似我定似阿媽呢？相信都幾啱用嚟打牙骹戰。」
而李亞男就話：「好開心終於做媽媽喇，第一時間知道嗰陣真係好驚喜，同埋有啲唔敢相信。因為我哋雖然係Plan今年做爹哋媽咪，但冇諗過咁快就實現到，真係好感恩。其實仔定女我都冇所謂，因為我都會好鍾意。最緊要係BB嘅成長過程夠健康，同埋佢嘅成長夠開心快樂。」
李亞男仲話已經同Amazing Esther嘅好姊妹分享呢份喜悅：「我有向Linda同宋熙年取經，問定佢哋有咩嘢唔食得，同埋可唔可以做運動，真係好多好多問題想問，始終自己冇經驗。」為咗個b著想，李亞男喺飲食方面都好節制：「我食少咗好多甜品，同埋飲少咗好多咖啡呀，o依家會好好Take Care自己，爭取多啲時間休息！」
《蘋果》今日問番祖藍拍檔阮兆祥，佢原來事前都唔知呢件事，祥仔話:「我星期一見到阿男仲叫佢快啲生㖭，估唔到佢哋真係有咗！佢哋之前去咗加拿大溫哥華探親，祖藍早返幾日同我同思捷去澳門做騷，第日祖藍晨早6點搭船趕返香港去機場接老婆機，唔怪之得佢咁緊張啦，原來老婆有咗。最緊要佢哋生仔嘅話要似祖藍咁聰明咁有才華，生女嘅話一定要似阿男，千企唔好似祖藍，如果唔係成日慳啲啦Bady咁架啦。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|