正所謂禍從口出！港台DJ曾志豪噚日朝早喺主持嘅《瘋Show快活人》忘記閂咪，在節目休息時段，咪後一句「X你老味」，換來封咪11日懲罰。
不過，喺節目「口出狂言」又點只曾志豪一個？噚日喺J2播出嘅一集《兄弟幫》，主持林盛斌（Bob）同陳國峰，請咗主持兒童節目《Think Big天地》幾位主持鍾君揚、鍾晴、何依婷、鄧家禮上節目，叫佢哋講下啱啱加入娛樂圈嘅經歷，本來話題無乜特別，但其中一位兒童節目主持鍾晴，稱除咗龜以外，對一切動物都感到，恐懼，佢講及當年拍街景時遇上佢最驚嘅狗隻，竟然用「工廠區嘅狗特別毛茸茸同污糟」、「即係…好乞人憎嗰啲啦吓」，鍾晴又舉例，試過搭lift見過啲狗好熱情，「朋友叫我扮唔好驚」、「因為狗見你驚就嚇你」、「都唔知佢（牠）咩心態」。結果辣㷫晒一班愛狗人士。
Facebook群組「支持領養！！救救可憐流浪動物！！」今日喺有網民facebook貼文，以長文批評鍾晴，篇文講明唔係唔尊重怕狗嘅人，但認為佢呢番言論好有問題。貼文一出，愛狗人士隨即洶群而出，紛紛留言回應，直斥她「無資格做兒童節目主持」，言論甚至係「教壞細路」，有人更批評佢「完全冇內涵」、「唔識愛護﹑尊重動物」、「如何化行個妝都遮掩不了內心的醜陋及冷血」，甚至提供埋表格話要集體向廣管局投訴。
唔少網友仲踩入鍾晴facebook，雖然鍾晴連日都無更新內容，最新一個貼文已經係上月27日，但網友分別喺佢唔同嘅舊貼文留言，鬧爆佢失言，其中有網友留言「鍾小姐！多謝你令我認識到你！但不是因為你的樣貌和表現。而是閣下的無知、冇腦、嚴重缺乏愛心的言論行為，而令我知道有你這種低級兒童節目主持人的存在！」
傳媒於事後搵過鍾晴，但未獲回覆。而鍾晴面對facebook洗版留言，就依然喺ig生活自在，喺ig story貼文上健身同飲食嘅相。
|
鍾意就快D Share啦！
|
|
|