終於，呢一日都要嚟喇。
黃子華最後一個棟篤笑——《金盆o浪口》棟篤笑，今晚紅館舉行頭場。
20:11，觀眾都入晒場喇，此時，熄燈，廣播宣佈：黃子華棟篤笑，即將開始，將會一氣呵成兩個多小時，大家要好好準備喇。
一如以往，棟篤笑開騷之前，先播片。今次，由90年黃子華第一個棟篤笑開始——《娛樂圈血肉史》，之後陸續有《色情家庭》、《末世財神》、《棟篤笑雙打之玩無可玩》，當然少不得1997年4月同6月舉行嘅《秋前算帳》——時光飛逝，轉眼去到2014年，《唔黐線 唔正常》，畫面播出黃子華雞蛋高牆片段。當時子華說：「我哋有仁，有勇，我希望我哋都有智慧，去保護我哋自己，不容一粒雞蛋粉碎，好唔好？」全場報以熱烈掌聲。
20:23，正式開場。全場報以熱烈掌聲。廣播繼續：請大家放低手機。不准拍攝。
20:25，黃子華出場由台邊上台。
一開始黃子華即同大家講最重要嘅兩句金句，全場已震動。子華說：「就係，就係……回水冇得傾！除褲冇得傾！冇錯，金盆o浪口喇，最後喇，有得嗌好嗌喇。嗌唔嗌呢，唔需要懶煽情嘅，因為都係你哋搞到我冇得做嘅啫！大家都知今時今日喺香港做個藝人係幾咁困難啦，大家對顏色嘅喜好唔同啫，冇得撈啦。『佢好鍾意黃色0架，死咗呢條屍唔要發黑，要發黃呀！黃屍嚟0架！黃屍華，冇得撈佢就唔啦，佢襟撈呀，佢個人好憂鬱，好blue。』咁點解襟撈？有孝心，瀨阿爺吖嘛。瀨阿爺喎，仲唔係廿四孝之最？『阿爺早晨，你邊度痕？』
「今時今日喺香港做藝人唯一生存機會係色盲，我都唔知黃同藍有咩分別， 黑同白我都唔係太清楚，彩虹我就分到，彩虹係0架啡色嘛，彩熊即係啤啤熊啫！識唱歌0架嘛。今時今日係識唱歌嘅啤啤熊都死呀，係以前你唱歌勁就叫勁㗎啦，我叫做張國友呀，我係張國榮加張學友呀，王菲見到我因為我太勁，都要改姓，依家叫做張菲呀，我一人唱歌都未輸過，但係依家就輸俾一個，都唔知係咩人嚟㗎，爛口爛舌，佢唔係唱贏我呀，佢係喺上面唱我呀！
「咁樣今時今日，我哋做一個藝人，搵食唯有咁，有老婆仔女，咁就唯有唔講嘢啦，但唔講嘢又俾心講啦：『搵人仔…』乜你講到好似拐子佬咁喎，捉啲人仔當錢洗，咁所以我依家喺大陸搵嘅錢，我會同人解釋清楚，我唔係exactly係大陸搵嘅，我係過關嗰時搵嘅，我係一路過關一路唱：『做個勇敢中港人...』一地兩唱ok吖，你話一地兩唱OK，你又會冇得撈㗎喇。
「你唔生性又講一句：『梁振英係好嘢嚟嘅！』但係冇得連任，共產黨冇眼光啦，恭喜你喇，你邊度都唔使去喇，從此你嘅職業就係o浪口，人哋返工你o浪口就得喇，邊度都唔使去，依家做生意真係好困難。」
|
鍾意就快D Share啦！
|
|
|