29歲失婚裕美與前夫林恩浩離婚後，去年10月更承認戀上外籍男友Alex（新聞連結： https://bit.ly/2Fxx7Zw ），佢同男友打得火熱，經常孖咇出巡。日前晚上8點幾，裕美同男友搭港鐵外出，但一程車期間因愛火高燒，熱戀中嘅裕美忍唔住啜咗男友一啖，被讀者李小姐透過「爆相爆片」分享。
李小姐喺電話表示：「嗰日夜晚8點幾，喺港島綫見到佢哋，裕美踢拖着得好樸素，途中兩人不時有講有笑，裕美喺手機睇到好笑嘢就同男友分享，裕美仲好快咁錫咗男友一下，佢哋笑得甜蜜幸福。」李小姐話因為裕美錫得太突然，所以佢影唔切相：「佢哋坐我對面，見到一個好靚嘅女仔，又高，睇清楚原來係裕美，casual打扮又冇架子，同一般情侶拍拖冇分別。」
《蘋果》致電裕美問到同男友感情咁sweet，佢甜笑說：「一直都係咁，冇乜特別嘛，錫一啖啫，原來我錫佢咁主動，哈哈！」係咪搵到真命天子？裕美表示：「唔知呀，我哋相處得幾好，冇乜特別。」Alex係外語學校創辦人，家住半山，估唔到兩人都貼地搭港鐵，裕美表示：「我成日都搭地鐵啦，冇乜特別，我仲會去街市買餸㖭，周潤發都搭地鐵啦，哈哈哈！搭地鐵方便嘛，又唔使搵位泊車，又可以掌握時間，我又唔覺得搭地鐵有乜問題。」
問到有冇結婚計劃？裕美坦言：「仲要時間相處下，其實唔想太過講結唔結婚，時間到就會係。自己有好多經歷，又結過婚，都唔想太多plan，順其自然。」提到4月被《蘋果》影到搬去黃泥涌道唐樓新居（新聞連結： https://bit.ly/2MOyhiP ），問到兩人係咪冇同居？裕美話：「冇一齊住會好啲，佢又會探下我，大家專注做嘢，佢又衝刺緊，自己都有想做嘅嘢，嚟緊會拍煮嘢食，成日聽人講好多女仔唔識煮嘢食，我想幫女仔爭啖氣，唔止男友讚過，第一個讚係王君馨，嗰時同佢住，成日煮嘢畀佢食，佢話如果佢係男人會娶咗我。」
精選娛聞，喺晒《娛果》
http://fb.com/appledailyent
| （裕美Instagram圖片、右圖：讀者提供圖片） | | |
| | |
|
鍾意就快D Share啦！
|
|
|