21歲嘅中葡混血兒麥嘉欣(Sofia Paiva)舊年代表澳門參加國際小姐，當時網民激讚佢生得標致，被網民推舉為「澳門小姐」，大讚佢靚過應屆香港小姐冠軍雷莊兒，而人氣急升。
麥嘉欣之前嘅感情狀況，就同澳門藝人沈柏彤拍拖，不過今年3月出活動就講到已回復單身，仲講到早喺去東京參選國際小姐前已醞釀分手。
話都冇咁快，麥嘉欣o依家已名花有主喇！日前本報讀者洪先生就透過《蘋果》爆相爆片，直擊佢同新男友搭港鐵，片中見到身穿黑色deep V連身裙嘅麥嘉欣，同男友喺車廂舉止親密，女方雙手攬實男友條腰，而男方亦一手攬住麥嘉欣纖腰回禮。片中所見，呢個一副模特兒身形嘅估計有6呎高，企喺5呎7吋高嘅麥嘉欣身邊高足大半個頭，所以麥嘉欣不時要抬頭同佢傾偈。
根據洪先生報料，佢指當時喺大約下晝4點幾，喺旺角向尖沙嘴方向嘅港鐵車廂見到佢哋：「佢哋兩個都幾親密，喺度互動影相，有講有笑，個男仔都高大靚仔，個女仔化咗少少妝，真人都係甜美，佢哋行為舉止似熱戀，互攬之餘又見到個男仔摸佢個頭，最後見到佢哋搭到去尖沙嘴就出閘。」
本報聯絡過麥嘉欣，問到佢同大隻男友搭港鐵互攬一事，佢直認拍拖，但就冇透露對方身份：「係呀，我o依家拍緊拖，都一齊咗一段時間，我同男朋友無乜話刻意特登隱瞞，無論我哋平時出街、網上平台都係順其自然，我有post過佢嘅相，而佢亦有post過story有我，之前我都有回應過有男朋友，不過可能無乜人留意到。」
據澳門知情人士爆料，同麥嘉欣拍拖搭港鐵嘅大隻男名叫李嘉豪(Kyle)，Kyle係16年國際先生香港代表，佢哋都係透過一個澳門選美聯盟認識。Kyle本身係現役甲一排球員，二人暗撻近1年，女方更疑似背住澳門男友沈柏彤，一腳踏兩船暗撻Kyle，皆因去年9月接受傳媒時，佢提到同沈柏彤鍾意喺Ig放閃戀事嘅同時，同月就有傳媒影到佢嚟香港睇Kyle有份出賽嘅排球賽事。
麥嘉欣與沈柏彤分手後即刪走Ig蜜照，之後就未有再喺Ig交代戀事，但佢同Kyle就間唔中喺社交平台放閃，好似上月佢哋就一齊去咗越南，麥嘉欣同Kyle就分別貼咗泳照同旅遊相，而麥嘉欣仲hashtag了#photographer，Kyle亦有留言，麥嘉欣友人就踢爆「攝影師」就係Kyle，可知兩人戀事已係朋友間公開嘅秘密，同埋麥嘉欣成日都喺Ig貼嚟香港玩嘅相，似乎要密密搭船過大海嚟keep住呢段「異地戀」。
精選娛聞，喺晒《娛果》
http://fb.com/appledailyent
| 「澳門小姐」麥嘉欣甩拖後有新歡，今個星期二過大海嚟香港，同六呎大隻男搭港鐵拍拖。（讀者洪先生提供圖片） | | |
| | | |
| | | |
| | | |
|
鍾意就快D Share啦！
|
|
|