曾幾何時，武俠小說裏面話：「孩兒，你長大了之後，要提防女人騙你，愈是好看的女人愈會騙人。」不過，時移世易，家陣就算唔計今期一晚走十一轉嘅「飯托」（時下少女呃飯食招數，古代亦曾流行，稱之為飯托）紅人嗰副尊容，淨係睇吓江美儀明明結咗婚又唔認，仲要屈「前度」老爺夏春秋記錯，就知女人呃人同個樣生成點係冇關係嘅。
冇錯，江美儀幾年前拍劇施展過一招「黑絲誘惑」，令到唔少人暈得一陣陣，仲被網友捧埋做女神。不過，時間會證明一切，女人始終係敵唔過日子嘅洗禮，睇吓佢早排為無綫新劇試造型，以妓女版嘅護士Look示人，唔知係造型師「鬼」斧神工，定係無綫都要負起教育市民唔好尋花問柳嘅責任，唔少網友睇完固然冇讚，仲直頭大呼效果太驚嚇，唔知仲以為佢特登Cosplay嚟趕客！
牙尖嘴利突然發茅
公道啲講，美儀姐可能係因為冇咗愛情滋潤搞到跌晒Watt啦，又難怪嘅，47歲人經歷過三段情，年近半百至嚟情場失意喎，莫講話樣殘，直頭心都傷埋啦，陰功。睇吓之前一路傳佢同吳君如細佬吳君祥分手，佢死都唔認，點知後來被踢爆原來分手係假，離婚至真，一時間大大個「失婚」招牌笠落個頭度，離婚嘅傷口好唔容易結咗疤，家陣又被人挖開，真係唔痛就假。
所以呢，當「前度」老爺夏春秋都開埋口，證實咗呢個「過氣」新抱的確曾經係吳家嘅人，平時牙尖嘴利嘅江美儀，突然變咗另一個人咁，竟然發晒茅，仲反屈係老爺記錯。喂，講大話已經夠衰啦，仲要擺埋冬叔上枱，同公然虐老有乜分別，知唔知咩叫關愛呀？最𤓓嘅係到後尾有圖有真相，冇得再抵賴，佢就改口話自己斷咗片，簡直大話到冇朋友。唉，為咗呢段情，江美儀歷盡否認、憤恨、抑鬱、妥協同接受呢五大心理轉變，可想而知，離婚對佢嘅傷害真係同絕症有得揮呀。
唔夠溫柔難逃分手
明嘅，想當日江美儀拍《衝上雲霄II》同男神馬國明喺劇中肉搏連場，仲爆響口話加咗場Morning Sex添，搞到馬國明班女粉絲既葡萄又嬲嬲豬，嗰時美儀姐一句「得」埋去，話：「不如你哋40歲時照吓鏡，睇吓有冇我咁靚先講」真係何其霸氣。梗係啦，嗰時佢婚姻、事業兩得意，有乜辦法唔飄飄然，講句嘢都口響啲？又唔可以話佢講嘢寸嘅，因為40歲嗰時嘅佢真係靚吖嘛， 頂盡只係有嗰句講嗰句，真情流露囉。
江美儀勢估唔到，同張瑛個仔拍咗五年拖，以為同吳君祥閃婚，叫做可以買個保險喇，點知始終都係難逃一散。正如佢自己話齋， 成日覺得自己唔夠溫柔， 咁咪係囉，明你又唔做， 做你又做錯，仲話會再等下一位有緣人喎，不如問吓冬叔攞啲貼士去買六合彩，好似仲冇咁渺茫喎。
|
鍾意就快D Share啦！
|
|
|