【新增動新聞】
唔少公立醫院醫護人員近年嗌晒救命，話越嚟越多相信係新移民嘅求診者嚟睇病，加重公營醫療負擔。特首林鄭月娥日前反駁，話單程證人士年齡中位數比香港整體中位數更低，而公立醫院服務使用者大多數係長者，所以坊間批評單程證加重公營醫療負擔之說，係無準確基礎咁話，再次呼籲香港人要多多包容，要歡迎港人家屬嚟香港「團聚」。
「包容」呢兩個字，相信已經有唔少人覺得難聽過粗口，越聽就越嬲；喺公立醫院前線「救命」嘅急症室醫生，面對新移民車輪式求診，唔知又點睇？噚日公立醫院急症室醫生「Dr. Ray」，就喺佢個「Dr. Ray的急症室迎送生涯」Facebook專頁分享親身經歷，話最近有位身患肺癌嘅新移民女士，持香港身份證去求診，帶埋一大疊大陸醫療報告同藥單，開宗明義話希望喺香港醫病。醫病唔係問題，問題係呢位女士講明自己長居內地，每個月只係要畀3,000大元嘅標靶藥費，因為聽聞香港有免費醫療福利，所以先想嚟香港醫，慳番一筆。原文按此進入。
Dr. Ray話，世人都貪小便宜，如果某少爺再次喺天台撒銀紙，土生土長香港人一樣會去執，沒有誰比誰高尚，不過從未貢獻過就伸手攞福利，就係制度上必須堵塞嘅漏洞。
Dr. Ray話自己經過呢幾年修為，總算有些少道行，聽到呢位女士嘅要求並冇嬲冇拍檯大鬧，反而說之以理，唔係因為冇晒火，而係因為發脾氣只會令對方聽唔入耳。佢慢慢同肺癌婦解釋，話標靶藥物其實香港人都係要自己畀錢，所謂資助其實係要經過一輪審批，如果每個大陸人嚟香港都可以免費醫病，而且係重症，香港嘅醫院破產都唔掂。肺癌婦雖然認同Dr. Ray有道理，但仍然堅持希望喺香港醫病。
Dr. Ray就答佢「不要緊，這是你的權利，我可以幫你寫信」，但就順帶提醒多句，佢嘅情況嚟香港排腫瘤科門診，恐怕要一年半載，到時肺癌婦嘅標靶藥療程都完成咗，「你千萬不要放棄治療啊。」聽到要等咁耐，肺癌婦都有啲愕然，Dr. Ray就繼續解釋，話因為有唔少好似佢呢種病人嚟排隊，所以條隊越嚟越長，仲叫呢位女士「要堅決把握國家發展大灣區的機遇，將來江門、佛山、珠海的市級人民醫院，也會有國際級的醫療水準。」
肺癌婦雖然好感激Dr. Ray詳盡解釋，但仍然希望攞信去排隊，不過都有話如果真係要排咁耐，佢寧願返大陸繼續醫。Dr. Ray話，嬲都無補於事，要心平氣和討論至有用，短短10分鐘已經令呢位女士明白，越多人嚟排隊，條隊就會越嚟越長：「這麼簡單的道理，香港高官卻視而不見、掩耳盜鈴，一個二個都是吃了屎的。」
【網民點睇】
Miumiu Ng：Dr.Ray 的確係一位EQ極高的醫生…如果換轉係我一定已經扯咗火
Cherry Cherry：呢個病人質素都算唔錯，起碼冇打人
Rebecca Chan：佢哋啲行為非常自私，喺大陸已經有得睇，仲要嚟香港排隊，令到真正有需要嘅原本香港居民無端端要排非常長的隊！害死香港人！
Danny Cheung：問題係看似明白明理，但態度依舊！佢哋會照係香港排！
Tam Tin Po：聰明既高官並非視而不見，因為成件事都係政治任務，由政府自編自導自演…
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI
| 《蘋果》製圖 | |
|
鍾意就快D Share啦！
|
|
|