蔡宛珊（Sarika）15歲開始做模特兒，之後轉型做司儀，近年加入ViuTV做主持兼拍劇。但入行19年，對觀眾而言，仍然好陌生。
直至近日一單桃色新聞，Sarika的名字與大台花旦姚子羚扯上關係。有指姚子羚搶人老公，在Sarika與前夫Raymond仍未搞清離婚手續時，已搭上Raymond，另外還有圈外二奶、鬼妹等，Sarika才有機會登上娛樂版C1頭條。
默默耕耘無人問，會否有點不甘心？Sarika昨日接受《蘋果》專訪時，淡淡然說：「所有事發生都有佢嘅原因，我咁多年喺呢行，名利上唔算大紅大紫，但都多謝客戶支持，每年都搵返我做司儀，多年來儲到啲錢，24、25歲就同ex-husband（Raymond）夾錢買樓，算好好彩。」
Sarika自覺是一個硬朗的女子，爸爸是馬來西亞華僑，媽媽是印度人。擁有中印血統的她，雖然在香港土生土長，但亦曾遭受歧視，她說：「會㗎，尤其我媽咪嘅年代。甚至乎我細個，我哋（同細佬）唔敢話畀人聽我係印度人，因為會有啲歧視眼光，例如俾人嗌『差妹差仔』，又搵啲嘢笑你，話你鍾意食咖喱，我覺係冇乜禮貌，會唔開心同難受。但我好tough嘅，好難俾人蝦，加上我係家姐，仲會照顧細佬，我份人睇好多正能量嘅書，最叻將負面嘢從好嘅方面去睇。」
Sarika的不屈精神，或許是從她父母身上學到，她說：「我未去到要捱窮，但亦唔係大富大貴。細個Daddy成日話我係lucky star，因為我未出世前，父母係寄住外公外婆屋企，我出世後就抽到居屋，我喺居屋長大。父母都係好上進同努力嘅人，媽咪同我係同一年考會考，佢係非常成功，之後攞埋博士名譽，現在係大學講師；而Daddy雖然已經65歲，但佢仍然有做汽車生意，同樣好努力同上進。」而Sarika精通廣東話、普通話和英語，中五畢業後，還有修讀牙科手術助理課程，而且是廣告及公關學士。
不過，再堅強的女人，面對感情問題都會變得脆弱。Sarika與Raymond拍拖4年，結婚6年，還有2年分居期，她坦言分開亦是一個艱難的決定：「係人生最難行嘅抉擇，同最難行嘅一步，分開唔係一個半個原因，有生活上嘅分歧、價值觀唔同，但感恩呢段時間家人同朋友都好支持我。」有指Raymond一直希望復合，曾否心軟？Sarika想了一會說：「畢竟都10年，冇話心唔心軟，好多原因，都知呢步都要行。」對於姚子羚疑搶人老公，Raymond又有二奶三奶，Sarika都不願多談：「同佢（姚子羚）係普通朋友，有就呢件事聯絡過，但過去咗，甚麼奶都好，唔去諗、唔回應，唔想深究。」
婚前婚後，其實Sarika都不乏追求者，她自言不是一個貪錢女人，她說：「認識我ex-husband時，佢都唔係一個有錢人，佢都係做樓面，大家真係一齊成長，一齊努力，我不嬲都係靠自己，公一份婆一份，從來冇攞過家用，完全冇。」二人離婚後，曾有傳Raymond將昔日愛巢賣掉後給予Sarika贍養費，Sarika再度否認：「我哋係喺律師面前，將錢一人一半分咗佢，我就用嗰筆錢加埋積蓄購入現在住緊嘅單位，一個單身女人要做嘢、要供樓、要生活係吃力，但我相信繼續努力係會捱得過。」
34歲的Sarika對愛情仍充滿憧憬，問到擇偶條件？她笑說：「最重要專一、尊重同誠實，大家價值觀要相近，因為我好重視家人同朋友，對方要錫同尊重我屋企人同朋友。錢對我唔係首要條件，靚仔？合眼緣ok啦，鍾意就會覺得佢靚，哈哈。」會否考慮雪卵？她說：「我都鍾意小朋友，我個人比較健康，鍾意運動，相信體力都應付到（生小朋友），如果過多兩年仲未有機會，都會考慮雪卵。」
採訪﹕嵐山
攝影﹕林德雄
攝錄﹕廖達燊
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
| 左圖：受訪者提供 右圖攝影：林德雄 | | |
| | | |
| | | |
| | | |
| | | |
| | | |
| | |
|
鍾意就快D Share啦！
|
|
|